仲記得舊年，紐卡素由英超降班英冠，成個紐卡素都一片愁雲慘霧，個個「喜鵲」迷都面如死灰；但前日佢哋喺英冠反勝錫菲聯2:1後，喺英冠踎咗316日後，下季終於重返英超，班球員同「粉絲」總算飲得杯落。不過，我求大俠希望紐記可以生生性性，千祈咪做升降機。
紐記前日喺聖占士公園對錫菲聯，原本只要攞1分就升班，但因為踢先過佢哋嘅諾定咸森林喺主場同卡迪夫城踢成0:0，所以變相輸波都肯定升返上英超。唔知係咪開心得滯，佢哋喺22分鐘俾對手加斯威爾射入落後0:1；不過佢哋喺完半場前由盧雲克蘭斯射入12碼追平，再喺73分鐘由路蘭入多粒反勝2:1，用贏波嚟慶祝攞到英超入場券。
紐記舊年降班後，雖則走咗奧雲、馬田斯、杜夫同巴桑等球星，但留隊嘅夏柏、高洛仙尼、路蘭、艾美奧比同盧雲克蘭斯等打得都好好，加上又打起咗安祖卡路爾呢個新星；所以今季喺英冠一直有好表現，呢個英超席位係實至名歸。家陣佢哋41戰得89分，比次席西布朗多6分兼少打1場，嚟緊目標，應該喺英冠冠軍。
降班賠率2.625倍
紐記領隊曉頓賽後話：「我哋絕對值得返英超。」紐記升班後，有博彩公司即時開出相關賭盤，喺下季英超攞前10係9倍。不過佢哋嘅降班賠率就有好大偏差，好似Betfred開5.5倍，威廉希爾就係2.625倍；Betfred發言人麥克皮亞臣話：「好大程度睇紐記呢個夏天簽咩人，但佢哋嘅經驗對留級好有幫助。」
紐記嘅肥佬老細艾殊利入主後使咗2.5億鎊，家陣都未回本，唔使旨意佢會開水喉簽世界級球星；但踢波嘅嘢，實力唔夠咪用其他嘢搭救，我求大俠希望紐記可以上下一心，咪好似上季咁踢到一盤散沙，如果唔係隨時開心一年又再死狗過。