甄子丹、熊黛林(Lynn)同黃曉明合演嘅新戲《葉問2》,噚日傍晚喺北京舉行記者會,不過拍緊另外一套新戲《趙氏孤兒》嘅黃曉明,足足遲咗成45分鐘先趕到現場。
喺戲中飾演兩師徒嘅甄子丹同黃曉明喺現場互笠高帽,子丹讚曉明雖然打到周身傷,但依然好勤力,曉明即刻好識做咁話:「我可以跟宇宙最強的子丹對打,所以才能練到銅皮鐵骨。」佢仲話喺子丹身上學識顧家同錫老婆,問到佢係咪講緊緋聞女友Angelababy?佢只係答:「男大當婚,女大當嫁嘛。」再追問佢同Baby嘅關係時,佢就話:「不聊這個。」不過全程都笑笑口。提到有傳Baby隆胸,曉明立即話唔想多講。
Lynn嫌城城未夠班
至於Lynn就話自己喺戲中扮演一個成功男人背後嘅女人,好大壓力喎。問佢喺現實中搵到成功男人未?佢居然話未,唔通郭富城仲未夠級數?Lynn即話:「我講戲中角色,我打算結婚後先做男人背後嘅女人,可能會減少工作照顧屋企人。」