呢壇嘢，雖則雨點小小，但係八方都要畀個like佢。喺執政者或明或暗咁維護小圈子功能組別立法會議席嘅大氣候裏面，名校男拔萃書院（DBS）嘅畢業生行出嚟，同師兄兼飲飲食食界立法會議員張廿蚊劃清界線，不要功能組別。
校內健身室被拆
張宇人嘅廿蚊最低工資論激起嗰團火，由立法會燒到《城市論壇》，再燒到男拔萃。喺噚日嘅真普選大遊行裏面，有幾位年輕人，打住男拔校呔，拎住巨型廿蚊張，一邊行一邊怒轟校董張廿蚊。帶頭嘅係97年畢業生Leslie，佢任職物流，喺facebook發動校友團結起來，參加遊行踢走張廿蚊。
現場所見，最少有三個DB仔現身，Leslie話，仲有十零個唔敢見報嘅DB仔縮埋一二邊，暗撐反張廿蚊小隊。原來佢哋不滿張廿蚊嘅地方好多，唔止係因為反對功能組別。Leslie形容，張廿蚊過去嘅言行已經裏裏外外咁搞臭咗DBS個朵。在外，佢不理基層工人死活；在內，佢破壞咗校園嘅人情味。據Leslie講，張廿蚊聯同其他校董通過，拆除校內一個幾十年歷史嘅健身室，又趕走埋喺DBS經營多年嘅家庭式小食部，引入連鎖飲食集團大家樂。Leslie形容，張廿蚊係拔萃之恥，有佢喺校董會一日，男拔嘅校譽都受到連累。所以佢鄭重促請DB校董會踢走張廿蚊，保育校風。
聽到母校搞出內訌風波，身在美國嘅男拔校長張灼祥話，對於噚日有男拔校友咁做，唔覺得出奇。佢話：「學生有表達自由，你知我哋啲仔，個個都敢言，呢個冇問題，係香港社會可愛地方。」不過一張銀紙有兩面，張校長話，張廿蚊60年代喺男拔讀書，幾年前男拔轉做直資，佢就年年為母校籌款，好落力，呢個功勞唔可以抹煞，所以應該將張廿蚊分開來睇。
另一浪反張行動
喺facebook，另一位網民TommyAnti-Cheung已發起另一浪反張行動：「我相信可以召集至少1,000名DBS學生和oldboys要求校董會把張（廿蚊）宇人撤職」，暫時有大約600人加入。呢壇嘢，怎一個like字了得！
mailto:[email protected]