李思捷與王祖藍兩位無綫扮嘢王，前晚錄影節目扮鄭中基與蔡卓妍（阿Sa）宣佈已婚及離婚的記者會，互相安慰及傷心流淚抄到足，內容由結婚改為吃豬大腸，無聊得令人忍俊不禁，但祖藍事後表示會向阿Sa致歉。
汪明荃、李思捷、王祖藍及湯盈盈等前晚在將軍澳電視城錄影《荃加福祿壽》，幾位演員不停扮秘婚藝人，李思捷與新人陳亭嘉扮劉德華拖着朱麗倩從大馬返抵香港機場一幕。其後他又扮「射葱喱」即「阿葱」，與王祖藍扮的「菜桌鹽」即「阿茶」，重演鄭中基與蔡卓妍宣佈已婚及離婚的記者會，二人說話哽咽、傷心流淚也抄到足，但自白內容卻由結婚改成吃豬大腸。
李思捷扮的「射葱喱」說：「我哋喺L.A.一齊食豬大腸，呢件事係私人事，唔需要冇必要公開，外間不斷猜測我哋係食魚腸、粉腸、甚至人腸，其實我哋一齊食豬大腸啫，希望大家可以成為永遠食豬大腸嘅好朋友。」
亂噏洛杉磯食腸
王祖藍扮「菜桌鹽」接着說：「我哋由旺角去到L.A.，諗住食晒全世界嘅豬大腸，呢個係我哋小小嘅秘密，我知道為食嘅人係唔可以存在秘密，我哋以後唔會一齊食豬大腸，原來唔只係兩個人嘅事，係影響到啲豬會冇咗條腸，我哋喺度同啲豬講對唔住。」然後二人站起作90度鞠躬致歉。事後王祖藍說：「我同阿Sa唔熟，有機會想sendSMS同佢講唔好意思，我錄嘅時候都有同導演講cut減啲o架。」
盈盈打底扮祖兒
此外，湯盈盈扮容祖兒穿高跟鞋跳舞，她表示沒有醜化祖兒，並發現穿高跟鞋跳舞確實好難，她說：「企都有問題，我仲要着多兩條底褲防走光㖭。」
採訪：楊潔雯
攝影：黃偉雄