金融海嘯影響真係大，入境處反偷渡情報局指揮官黃松耀話，舊年喺機場捕獲嘅人蛇同偷渡集團成員人數都下跌咗，佢分析，金融海嘯係偷渡活動減少嘅原因之一，因為「唔少人蛇偷渡都係為咗搵多啲錢，但主要目的地嘅歐美國家都經濟不景。」
轉往其他地區中轉
黃sir仲話，以往香港係人蛇偷渡中轉站，但近年經佢哋嚴打，去年5月仲成功搗破一個最少涉及四單案嘅偷渡集團，拉咗11人，包括骨幹分子，將個集團連根拔起。自搗破呢個偷渡集團之後，舊年機場偷渡個案由上半年16宗急跌至下半年得番兩宗，喺機場拉到嘅人蛇同偷渡集團成員亦分別減少一成同近三成，分別只有227人同74人。據知，近月仲有迹象顯示，人蛇已經捨棄香港，改用鄰近地區包括台灣、泰國作為偷渡中轉站，以增加偷渡成功嘅機會。