港大醫學院呢頭話要招攬人才喺深圳開間濱海醫院，但嗰頭就陸續有名教授投奔私營市場，繼骨髓移植權威梁憲孫後，腸胃內科專家王振宇下個月亦去中環開檔。佢專門研究胃癌同胃酸倒流，佢走咗之後腸胃科恐怕青黃不接。
腸胃科猛人逐個走
王振宇教授舊年憑胃癌研究奪「國家科學技術進步獎」一等獎，多年來埋首胃癌及胃酸倒流研究，同黎青龍教授係腸胃及肝臟內科兩大頭馬，一個專長腸胃，黎教授就係肝病權威。由於王振宇係舊年入獄嘅前院長林兆鑫嘅徒弟，所以一直都有傳聞話佢會離巢，到最近終於落實去中環開檔，喺港大做埋5月尾。
噚日假期王教授仍然喺港大開工，佢話仲有唔少研究會繼續，強調佢走咗亦有人接手，唔會青黃不接。查實，同team嘅黎青龍同袁孟峰教授都係搞肝病為主，雖然仲有好資深嘅陳志權醫生，但腸胃科呢幾年一個接一個咁走，好似胡興正同陳安安醫生，都咪話港大唔係人才流失。另一邊廂，瑪麗換肝隊伍顧問醫生吳國際亦選擇離開公立醫院，范上達同盧寵茂教授又失一個左右手。