現年42歲的李克勤昨日公佈上周再做老竇，親身陪太太盧淑儀入產房，看着愛妻為他剖腹誕下重7磅多的次子Rex。他更笑稱兩個兒子分別是他的大老闆和二老闆，又透露每日大唱冧歌幼子安睡。
李克勤與太太盧淑儀已育有兩歲多的長子李立仁（Ryan），由於兩夫婦酷愛小孩，盧淑儀去年再度懷孕，預產期在本月，但有消息指她上月26日已低調入養和醫院剖腹生子，母子平安，小虎B中文名字未定，先改英文名Rex，體重3.3公斤（約7.3磅）。
陪入產房親睹兒子出生
經數天休息後，盧淑儀已於上周三秘密出院，至昨日克勤始親自撰寫電郵向傳媒公佈他丁的喜訊，他指囝囝上周出世，又鬼馬地稱BB是其二老闆，並首度公開他與新生兒的合照，相中的克勤目不轉睛地看着酣睡的Rex，一副慈父相。
克勤夫婦今次再誕麟兒，湊B可謂駕輕就熟，克勤表示有陪老婆盧淑儀進產房打氣，他在電郵中寫道：「同上次大老闆出世一樣，二老闆上星期出世，我也有進產房十卜十卜（support）。」從照片看來，克勤的幼子臉蛋圓碌碌，最可愛是他熟睡中還露出一副開心甜笑的模樣，認真人見人愛。問到Rex究竟似爸爸還是媽媽時，克勤說：「佢最似Ryan，餅印一樣。」
克勤是曼聯擁躉，故外間一直有指他為長子取名Ryan是為了捧偶像場，對此克勤說：「其實上次大老闆叫Ryan同RyanGiggs（曼聯球員傑斯）冇關係，我哋純粹覺得Ryan好聽，好似好斯文，而且意思我哋又好喜歡，果然Ryan家兩歲半，真係比較文靜，成日都鍾意睇書。」克勤又透露暫未為次子想好中文名，但已改了英文名Rex，而非外間猜估的球員名字如朗尼（WayneRooney）或加利尼維利（GaryNeville）。
克勤又表示日前已安排妻兒秘密返家休息，他說：「呢段時間我會盡量留喺屋企照顧媽咪同BB，5月先再戰江湖，要積極搵奶粉錢，到時會出廣東碟同做左麟右李巡迴演唱會。」克勤更已聘請陪月人員貼身照顧盧淑儀，讓她可安心調理身體。
「BB最享受我抱住佢un」
由於已有湊Ryan的經驗，克勤這次照顧Rex未有手忙腳亂，他昨日在電話中得戚地說：「我最叻係un，BB最享受我抱住佢unun吓，所以我喺屋企主力負責呢瓣，其他當然就係唱歌BB，佢家仲細，未識聽流行歌，我就對住佢唱ABC歌仔，呢首歌喺我屋企點擊率好高。」
問到哥哥Ryan可有因弟弟Rex出生備受家人關注而妒忌時，克勤說：「呢樣真係冇擔心，Ryan唔知幾咁錫細佬，可能自從媽咪一有咗細佬，我哋兩公婆就不停同Ryan解釋，所以佢都好開心多咗個細佬。」克勤口口聲聲稱呼兩子是其大老闆和二老闆，那他自己在家是甚麼職位？他搞笑說：「我咪係負責剪接同攝影部嘅員工，我好鍾意幫佢哋影相同拍video，留為紀念。」
此外，克勤熱捧的英超勁旅曼聯日前在英超榜首大戰中，以1:2敗給另一英超勁旅車路士，氣得克勤在其內地新浪微博中說：「谷鬼氣。」
撰文：林妃
話你知：拉丁文Rex意指羅馬王
李克勤為次子取英文名Rex，這個音譯為雷克斯的名字其實相當威猛，如雷克斯暴龍（TyrannosaurusRex）是最著名的恐龍之一，目前已有數個標本，在化石研究上有很重要的份量；除了T.Rex，也有E.Rex（雷克斯艾德瑪龍）及O.Rex（雷克斯奧斯尼爾龍）等等。
除了威猛的暴龍名為Rex外，在拉丁文中Rex也指羅馬國王，台灣的出版業知名人士、韓籍華僑郝明義的英文名也叫Rex，同名的還有美國前職棒大聯盟外野手RexAllenHudler，以MarcBolan為首的英國GlamRock隊伍T.Rex同樣舉世知名，連1935年成立的比利時法西斯黨也叫Rex。
相士話：李家小老虎催旺父事業
李克勤昨日公開宣佈其妻盧淑儀上周再為李家小虎仔，但也有消息指克勤幼子是上月26日剖腹出世，堪輿家麥玲玲指虎B如在清明節前出世，跟雙親關係很好，她在電話中說：「肖虎算係山中之王，所以虎B會有少少蝦肖羊嘅爹哋克勤，但佢哋都會好夾，而肖鼠嘅媽咪盧淑儀就係精靈派，會照顧得BB好妥貼。」她又指虎仔性格活潑外向，運動細胞強勁。
另一堪輿家區仲德指命格屬木的克勤子女宮很好，將來會兒孫滿堂，他說：「克勤命格起碼有三個仔女，家有兩個囝囝，唔排除下一胎係囡囡，虎B唔只好旺爸爸嘅事業，未來幾年克勤有機會音樂事業攞多啲大獎，另外仲可以有利爹哋媽咪婚姻，克勤夫婦會越嚟越恩愛。」
娛樂資料庫：虎BB陸續有來
2010年眨吓眼已過了四分之一，繼李克勤再男丁後，娛樂圈的虎年寶寶仍然陸續有來。
資料來源：《蘋果》資料室
趙薇
懷孕7個月的她現於新加坡待產，有傳她打算於下月生產後，即於6月復工賺奶粉錢。
張栢芝
現已腹大便便的栢芝，預產期為下月，老竇謝霆鋒正為囝囝改名而頭痛，預計為次子取英文名Marcas，揀這個名是因為想跟大仔Lucas一樣，以cas作名字的尾音。
黎姿
以體外受精技術成功懷孖胎的黎姿，目前懷有6個月身孕，更有指她為催運生仔而改名黎珈而。
趙頌茹
1月新婚的阿Yu已懷孕3個月，原本雙喜臨門，但近日老公周永恒卻被發現腦生瘤，阿Yu直言如粵語長片劇情般，很難令人接受。
鄺文珣
懷孕5個月的鄺文珣早前做檢查時，發現BB有些指數不正常而抽羊水覆檢，幸最終有驚無險。