去一啲social場合，遇着同枱熟人唔多都幾尷尬，早前去鴻星海鮮酒家搞嘅「分唇」，就靠一盅燉湯「破冰」。當晚個個低頭飲湯，點知一飲即刻醒神，因為味道真係好香。鴻星Erica話係雪華芝燉響螺翅。大家一頭霧水，「雪華芝係乜」就成為同枱話題。
原來，真菌雪華芝可以話係「亞洲嘅白松露菌黑松露菌」，日本人尤其鍾情，叫做Hanabiratake，分佈喺日本北海道至關東地區嘅高山地帶，生長喺秋天針葉樹殘枝嘅根部，或者係落葉松嘅殘枝倒木上，係古代日本百姓向天皇進貢嘅珍品。每年菌季開始，日本傳媒仲會刊登雪華芝最新價格，好似好大件事咁。
Erica話雪華芝味道好搶，一兩朵已經帶出松林清香同真菌鮮美。據講雪華芝有療效，蛋白質含量高達17%，仲有人體八種必需嘅氨基酸，豐富維他命B1、B2和維他命C。喺日本，雪華芝仲可以製成保健品，或者加落綠茶一齊食用。
盅湯真係好香甜，雪華芝咬落去有些少爽口，廚師話只係落少少已經夠搶。Erica話每磅要賣到四位數，即係以千元計，喺香港唔係咁易買到，但據知已經有代理喺度傾緊，應該會容易啲買到，鴻星就計劃引入餐牌，畀本地食家試吓。
電郵：mailto:[email protected]