夢有好多種，有甜夢、噩夢、荳牙夢、綺夢、白日夢……，家陣利物浦領隊賓尼迪斯發緊嗰隻應該係春秋大夢。紅軍前日對伯明翰贏形勢而和波，距離前4目標越來越遠。但不嬲鍾意死撐嘅賓帥並未放棄，話需要喺最後幾場波作「完美演出」。唔係我睇死紅軍，但睇隊波近況，想5連勝真係唔易；再講，就算真係得，你當曼城死o架咩？
「爭前4係有難度，但我哋要相信自己可以贏晒剩低幾場波，亦要相信勁敵會失分；我哋過去參戰歐聯嘅經驗，或者可以幫到手。」賓帥有信心係好事，但眼前形勢實在不妙。紅軍和波後得55分，分別落後少賽一場嘅曼城、熱刺4分同埋3分，雖則話人家硬仗連場，但紅軍何嘗唔係有場主場對車路士嘅硬仗在後？再睇紅軍前日對伯明翰踢到一團糟，唔怪得外國博彩公司已將紅軍入到前4嘅賠率，轉冷到5倍。
「F托筋疲力盡要換走」
賓帥有信心，但球員未必有，淨係講前日佢喺完場前25分鐘就換走費蘭度托利斯（F托）時，謝拉特搵隻手去自己個頭，似乎連隊長都對賓帥此舉摸不着頭腦。
好衰唔衰呢一幕俾攝影大佬清楚捕捉到，之後唔少人仲將段片擺上網，好似公告全世界：連謝四都唔信個領隊咯！
睇番場波，F托離場後紅軍真係有幾次入波機會，呢啲機會如果由F托主理，點計應該至少可以省入一粒。好嘞，即管聽吓賓帥點為自己嘅調動辯護：「我知佢（F托）被換走唔開心，但我睇佢筋疲力盡，好攰、好攰，而換佢走亦係保護佢嘅膝頭。」紅軍前4夢唔易實現，奉勸賓帥都係實際啲發個歐霸夢，講到尾，禮拜四迎戰賓菲加要平反1:2敗局唔算太難，既然行情捧紅軍係呢個賽事嘅奪標大熱門，賓帥不如專攻呢個盃仔仲好啦！
謝四頭逐格睇