河蟹橫行，不但藝人Gigi梁詠琪遭殃，連之前叫「儍強」最近叫Leven（《女王辦公室》角色）嘅杜汶澤，喺網上出聲撐吓Gigi，都不能倖免。
話說Gigi上星期三喺內地新浪網個微博，轉貼毒奶粉案維權爸爸趙連海受審單新聞出嚟，隨即被刪，杜汶澤翌日喺同一網站佢個微博度又將Gigi慘被河蟹嘅報道轉貼出來，一分鐘後遭逢同一命運，被網站強行刪去。
23條若立法不堪設想
杜汶澤好唔忿氣，星期五喺雅虎香港嘅個人網誌度，發表咗篇題為《共建河蟹》嘅博文，講述事件經過。佢話，個微博被刪之後佢又發咗另一條：「愚人節……新浪，你整我嗎？沒問我刪我的微博??????」但過咗一分鐘左右，都被刪埋。
之後，佢收到封私人訊息來自「微博小秘書」：「杜先生您好！想和您解釋一下，昨天Gigi的內容是不適合討論的，也請您理解和體諒。」杜生好體貼，喺香港個網誌度，向可能到家都仲未知乜嘢叫河蟹嘅少數網友解釋，「在大陸，這種行為稱為『河蟹』，『河蟹』國語和『和諧』同音。」最後，佢「祝願國家昌隆興盛，社會和諧。」仲話：「雖然多一些無聊留言，還是這裏好。至少自由。復活節快樂！IloveHongKong!!!」
杜汶澤篇博文一出，班網友粉絲熱烈回應。Ho建議：「澤哥，下次引述國家領導人的說話看看會點，中國最好戲嘅溫家寶說過：『我們普查了受到奶粉影響的兒童達到3,000萬。』但這可能是國家機密，小心小心。唉﹗願他們可一家團聚﹗」
Eddie話：「在這次事件中看到港星也是有heart，有感覺，珍惜自由的，雖然我不追星，但想講句，港人都以你和Gigi為傲。阿澤，有冇想起你喺《無間道》中「儍強」嗰一句：我可以笑嗎？」Marjorie嘅慨嘆八方最有同感：「言論自由呢樣嘢真係好寶貴，大陸樣樣都封鎖，真係唔知如果香港立咗23條會點？」
mailto:[email protected]