有個讀者報料畀八方，話飲食界立法會議員張宇人差不多朝朝都去灣仔石水渠街池記食早餐，但自佢發表完最低工資時薪20蚊論之後，唔知點解，最近佢淨係叫司機落車幫佢買，情願拎上車食，有次就見佢趁食肆入面人少少，急急腳入去匆匆食完就走。
聲稱有好多人支持
阿讀者話，佢個人對張宇人冇乜特別好感或反感，但就揣測佢係咪驚當街俾人鬧，所以改變食早餐嘅習慣。八方覺得，家啲讀者真係好鬼醒，但基於傳聞證供不能當真、疑點利益歸於被告嘅原則，八方於是畀當事人回應吓。
張議員話，首先佢唔係朝朝去池記，佢有時去大圍有時去九龍城食早餐，去池記主要因為太座喺附近返工，周不時送佢返工兼撐枱腳食早餐；第二，自廿蚊論之後，佢絕冇因此避去公眾場所或叫司機幫佢去池記買早餐，佢照常去茶餐廳食嘢，仲話「冇人鬧過我，反而好多人支持我、鼓勵我。」
佢仲話，池記雖然噏dup，但咖喱好食；早餐冇乜特別，但唔想食白包嘅張廿蚊仲會帶埋啲麥包去，叫夥計幫佢烘。八方問佢係咪同池記老闆好熟，張廿蚊聲稱，佢同班夥計仲熟。