清明節之前，左丁山之中學死黨告別人間。跟住聽到奇女子狄娜辭世；狄娜果然係奇人，生前寫下遺言，要兒子MichaelMa交畀友人開記者招待會宣讀之，內有傳媒應該發揮力量，推動社會進步云云。冇話狄娜唔啱，啱到極㖭，不過佢生前唔知有冇在北京向領導人為新聞自由進言呢？狄娜生前美艷動人，一九七二年在李翰祥執導嘅《大軍閥》，有床上全裸演出，轟動一時，後來佢憑天賦才能，趁四人幫垮台，中國開始開放，轉戰大陸商場，自言曾經為中國做間諜，其真正身份變幻莫測。記得有一次在啟德機場排隊過關，前面有位香噴噴（香水夠香也）婦人，淨係睇背後已係「貝多芬」，點知佢突然回頭，向左丁山一笑：「乜咁啱嘅，係你呀，你去邊度呀？」啊啊啊，竟然就係狄娜，左丁山為之暈得一陣陣，若非老婆在旁，一定企唔穩。經此一役，方知佢能夠縱橫大陸官場、商場，起碼佔晒先天優勢先，當然佢之時事及歷史認識，並非一般香港生意人所能及。
「貝多芬」一詞，乃餐飲M教嘅，佢話中環行人路上，每每見到好多靚女身形之背影，於是急步趨前，向後一望，哦，面貌普通啫，與美麗背部不相稱，只係「背影夠多分」，故名「貝多芬」。至於狄娜，就係「背多分，前加分」一類。
講起貝多芬，前星期深宵睇一齣電視電影，叫做《CopyingBeethoven》，講述一位清秀女子/優異音樂學生為貝多芬抄寫第九交響曲嘅故事，乃二○○六年作品，男主角EdHarris做慣硬橋硬馬之動作片，估唔到扮演年老耳聾半失控之貝多芬，演到十分動人。但電影故事純屬虛構，幫貝多芬抄稿者實在係兩位男士，而且絕對唔敢修改貝多芬嘅音符。貝多芬在一八二四年已經難以聽到別人講話，點解仲能夠創作如此偉大音樂呢？睇呢齣戲就知道甚麼是天才，甚麼是創作，知道自己如何不濟，安心啲做番一個普通平凡人，唔好向高難度挑戰。前美國國務卿賴斯講得對，苦苦學琴經年，當自知彈琴不如一位十二歲時，就要立即轉行嘞。現時一啲娛樂版女人唔照鏡，照過就清楚自己唔係狄娜，無謂發夢啦。