警隊「一哥」鄧竟成出年提早四個月離任，都可以成為大新聞，可見呢位一哥幾有爭議性，連向來同管方撐到行嘅警務督察協會主席廖潔明到噚日都仲話，鄧竟成開始退休前休假嘅時間，都冇當年李明逵咁早，當時李明逵早成九個月都冇人講，大家針對鄧竟成「唔公道」。
喺警察非官方討論區「警察俱樂部」，有女網民話一哥：「當初他上台時給我第一印象是年輕帥氣，曾見過他一面，身材很不錯，長得也帥！以為他SDU（飛虎隊）的背景會給警隊帶來雷厲風行和殺罰決斷的新氣象，可惜一路以來的表現卻讓人失望。」呢個留言令八方諗起，一哥上台之初嘅蜜月期，大家對佢印象仲幾好，有女粉絲仲形容佢對眼似梁朝偉，可惜呢個世界係現實嘅，幾年下來，已冇人再咁講。