鄭秀文（Sammi）今年1月喺紅館開完10場「LoveMi鄭秀文世界巡迴演唱會」後，唔只鬆一口氣，就連胃口都大開，日前佢同助手食完晚飯之後，再去便利店狂掃零食，咁食法，難怪當晚見到佢個樣有啲發福。
大前晚8點左右，Sammi由男性化打扮嘅女助手揸車接載去天后興發街嘅OysterC擦生蠔，雖然當晚Sammi披住頸巾又着外套，包到好密實，唔知係咪心廣體胖，見佢身形同面口都有啲發福嘅迹象。
薯片糖果乜都有
Sammi同助手食到夜晚11點先至離開，同行原來仲有一位男性朋友。助手同嗰位男性友人送Sammi上咗保母車之後就離開，原本馮仁昭諗住Sammi食飽飽之後會返去梅道蔚皇閣屋企，點知Sammi原來未夠喉，要司機車佢去灣仔一間便利店買零食，Sammi入到便利店之後表現好雀躍，不停左揀右揀，佢司機就全程跟實幫Sammi攞零食，唔使一陣，Sammi已經揀咗成籃零食，又買薯片、糖果同雪糕雪條，直情好似開party一樣。掃完零食之後，Sammi就坐車返番去梅道香閨繼續開餐。