都市人受到噪音滋擾，有時好難避免，連搭巴士都唔放過你。最近有唔少九巴乘客投訴話，車廂廣播系統報下一個站係邊度時，成日先播出「藍威寶提提你……」呢段長達十幾秒嘅溫馨提示，加上紅、白、橙威寶佔據唔同巴士路線畀提示，聲浪唔細，好多乘客不勝其煩，想搭車靜一靜都唔得。
累乘客落唔切車
廣告噪音令人心情煩躁都算，最弊就係因為段提示太長，有時巴士埋咗站，先讀出個站嘅地方名，唔少乘客試過咁落唔切車，無啦啦行多咗寃枉路，最後無辜受害嘅當然係個巴士車長，俾乘客捉住佢哋發洩。有乘客喺社交網站facebook成立咗兩個群組，「我唔鍾意搭搭吓巴士突然聽到『透明裝紅威寶』嘅廣告」同「強烈反對九巴喺車廂報站系統加插廣告！」群組已經累積咗三千幾人參加，足見反應好熱烈。
廣告惹人反感，原來真係會有反效果，有啲乘客已經喺群組留言，話明以後唔會買呢隻牌子嘅產品。環保組織環保觸覺呼籲乘客集體去運輸署交通投訴組投訴，睇怕九巴再唔搞搞佢，遲啲仲難收科。
九巴話推出系統時已得到運輸署批准，但聽到乘客嘅聲音，日後會注意廣告聲量，睇吓乘客收唔收貨啦！