Gary成日出trip，又成日唔記得買手信女友，後尾學精咗，搭飛機時喺機上購物。不過佢話呢排女友又投訴：「佢話次次都係香水首飾啲細細件嘅嘢，一睇就知係喺機上買，鬧我冇心肝。」
送嘢都係心意，我係女人都唔爭佢女友，但見Gary咁愁咪同佢講，喺國泰航空做嘅Jennifer話，機上購物已經有「府上送貨服務」，之前由於機艙空間限制同埋攜帶規例，機上只有輕巧產品出售。不過，家喺機上訂貨，貨品可以送到乘客屋企，所以體積、種類都冇咁多限制。
Jennifer話，服務最初以酒為主，最近新增咗更多唔同種類新貨品，包括德國Rimowa小型手提行李箱、收到全球11,000個電台嘅Revo數碼收音機、Mitch&MarcAustraliaCinzia上鏈器錶盒，部份喺香港較難搵到；有啲仲係獨家，例如外形好靚仔嘅MinoxDCC5.0微型相機，喺第二度買唔到嘅亮金版（圖）。
其實就唔係乘客都可以上網買，Jennifer話有兩成都喺屋企訂購，網址係 http://www.cathaypacific.com/dutyfree。呢排國泰同空姐嘅爭拗有望解決，相信唔使搞到罷工咁大鑊，小妹反而替Gary女友擔心，佢會唔會因為成日買嘢，轉移鍾意咗個空姐呢？
電郵：mailto:[email protected]