台灣人氣偶像阮經天（小天）日前同電影《艋舺》拍檔趙又廷及導演鈕承澤嚟香港宣傳，前晚佢哋返台灣，唔少fans到機場送機，圍住偶像合照同攞簽名，場面非常混亂，但小天同趙又廷對fans仍然有求必應。
烏龍行錯路
問到有冇大嘆香港美食？鈕承澤笑笑口話：「是茶餐廳又茶餐廳。」小天就話今次嚟香港先有機會真正行街shopping，佢又透露鈕承澤喺嚟香港前送咗唔少新衫畀佢着。
之前有傳小天偷食，之後佢認錯仲話心中只有女友許瑋甯，問到呢幾日有冇掛住女友？小天笑住話：「我好愛我的家人，人生不單止女朋友，還有家人。」
不過之前小天講過女友係最重要，佢聽到立即話：「導演才是最重要。」結果三個大男人擾攘近20分鐘先入到閘，但佢哋又擺烏龍行錯入口，混亂中記者喺現場一度聞到一陣濃烈嘅尿臭味，唔知係咪有人見到偶像開心得滯忍唔住呢？另外，台灣女子組合黑Girl成員小薰同丫頭前晚同樣喺香港做完嘢，搭夜機返台灣。