個幾月前，公關大姐大邀請成班老友到馬場，研究C係半個專業馬神，一日十場賽事，佢只下注兩場，就係「印度光輝」搭落「沙貝利」一口獨贏過關，結果前駒倖勝，後駒輕取對手，研究C大注過關，贏到開巷，俾左丁山捉住佢請吃飯。
呢日去到IFC「利苑」，只見研究C塊面有啲青白，額頭有傷痕，正思疑佢發生乜事之際，大姐大就開口問候研究C：「仲有冇事呀？」研究C仔細道來，佢於三月五日參加母校校友與教職員春茗，盡歡而散，與昔日同窗拜拜之後，行經灣仔道，一時不慎，睇唔到有的士衝過嚟，俾的士撞到飛起，在十呎以外撻落地下，當時以為係咁大咯，搏命做出四肢及腹部撻落地嘅姿勢，保護頭部，好彩幸運女神仍然眷顧，落地之時，腹、胸、面落地先，滑行數呎，眼鏡盡碎（但好彩冇刺眼），頭腦仍然清醒；又一世夠運，有現場途人照顧佢，而呢位途人竟然係一位女醫生，後來送咗入鄧肇堅醫院急救，知道斷咗四條肋骨，其餘只是皮外傷啫。三月五日是星期五，研究C星期日就出院，星期一如常上班做研究報告，冇通知左丁山等人。
聽完佢咁講，連忙向佢舉起茶杯祝賀大難不死，必有後福。研究C話：「出院後又捉中隻冷馬『名人』爆十幾倍冷門喎！」咁好運，值得叫夥計選一條斤半東星斑清蒸，賀賀佢。大姐大喝住話唔好，價錢太貴喎。但研究C話：「經此一役，覺得生死有命，人有霎時禍福，吃春茗之時開心到興高采烈，點會諗到散席後就幾乎魂遊地府吖。有機會食好啲就唔好計較咯，馬會請嘅啫。」好啱聽啫，於是駁回大姐大之抗議。
人生幾何，譬如朝露，去日無多。朱培慶託人傳話，佢位小學同學冼耀斌已經去世，因知肥冼係左丁山中學死黨，故此通知一聲。唉，肥冼去世不久，左丁山已接到佢嘅家人來電，為之默然，憶昔日中三國文老師教〈諸葛亮前出師表〉大家讀到眼定定，真個是「臨表涕泣，不知所云」，於是分工合作，我教佢國文，佢教我數學，相互補習齊渡考試難關，後來佢成為會計專才，參與創辦CrownPacific與SantaFe，做過ESCADA香港高層，想不到咁快就捨我而去，寧不悲夫。