清明節拜神最緊要隻鮮雞，奈何活雞檔越來越少，令價錢變相提高，加上新一代主婦不愛逛街市，活雞要搵出路，實要靈活求變。當然，除鮮雞外，還有不少急凍或冰鮮雞選擇，務求令先人安息，活人安心。
記者：林佩婷
攝影：林栢鈞、譚盈傑、陳陶鈞
Model：Phyllis
多元化買鮮雞
要數雞壇大事，離不開禽流感、政府收雞牌等，令以往在街市活買毛雞的傳統逐漸萎縮。為了轉型，雞販各出其謀，有些人於網上賣雞，亦有外行人引入外國技術殺入雞界。
網上柯打即日送貨
要數網上賣雞，和平優鮮店的鍾耀華可算是第一人。賣雞廿多年，禽流感爆發，鍾生當時相信中央屠宰勢在必行，故他積極諗計令市民可以安全食用鮮雞，有日見位傭工透過3G電話讓主人揀雞，觸發起網上賣雞念頭。「我唔想再培訓轉型做保安，咁啱有朋友做網上生意，咪索性一齊搞。我哋標榜啲雞送貨前1個鐘先劏。最初效果唔理想，但經報紙宣傳後，最高峯日賣超過150隻。」現時他們提供7款鮮雞包括嘉美雞、泰安雞、芝麻雞、清遠雞、龍崗雞及竹絲雞，送貨須$200起，訂購時須列明需否保留雞頭內臟，及起皮斬件等處理，服務超細緻。
轉型變有機雜貨店
經過多年發展，以往新界地區要隔日送貨，現在東涌、西貢等地也可即日送貨。前年將其中一個雞牌歸還政府後，所有即日定單先由另一雞檔處理後運至北角店，再作運送，「隻雞送上門時仲暖暖哋。」之後鍾先生將北角店改造成專賣本地豬、有機食物等雜貨店，「以前賣雞都有幫啲客買餸，後嚟索性改造成專賣本地貨嘅雜貨店。」
網上外賣雞過程
和平優鮮店（25718077）
地址：北角春秧街91號地下
網址： http://www.chicken.ttyy.net/index.html
超市有鮮雞
惠康旗下67間有家禽櫃位的分店，出售來自廣東或元朗雞場的新鮮三黃雞（每隻$98，截至4月1日），顧客亦可於早一日預訂。（查詢：22991133）
六大鮮雞
加拿大風乾鮮雞
當雞販意興闌珊歸還雞牌時，卻有外行人於06年豪擲過百萬搞風乾鮮雞技術。永達農場店長梁先生話加拿大風乾鮮雞已運行廿多年，整個過程是將處理好的三黃或芝麻雞掛在雞架，用高壓水槍清洗，放入0至4℃風冷房風乾4小時，最後用真空包裝，確保肉質鮮味及無菌。
最初在香港生產，後來和廣州農場合作，將整個技術北移，梁生話最初香港對此技術好陌生。「開舖時要申請牌照，政府都唔知點發好，搞咗三個月先掂。最初香港人以為呢啲係冰鮮雞，經過半年先真正認識，曾經喺新年時賣過千隻，要早一個月預訂。」店內還有加拿大風乾急凍雞等售賣。
風冷鮮雞背面寫明雞隻來源。每隻$55（2斤以下）、每隻$65（2斤以上）
此加美雞不同彼嘉美雞，加美雞屬美國和加拿大種的雞。$95
永達農場（24771823）
總店：元朗牡丹街27號牡丹樓B舖地下
冰鮮急凍雞選擇多
市面還有不少冰鮮和急凍全雞選擇，冰鮮即將雞隻屠宰後冷凍至4℃；急凍則指將雞冷凍至-20℃至-18℃以加長保存期，但解凍後不能再急凍。各高檔超市均有來自各地以天然或有機飼養的冰鮮或急凍雞。
ThreeSixty天然有機
ThreeSixty有新鮮嘉美雞售賣外，還有4款標榜天然和有機飼養的冰鮮及急凍雞。天然即無打針、餵食天然飼料，只差沒領有機認證。而店內出售的有機急凍雞到港後會先行解凍，保存期約5日。（查詢：21114480）
city'super名貴法國國雞
出售15款來自法國、加拿大等地全雞，最受歡迎是被譽為法國國雞的冰鮮Bresse雞，腳藍身白頭紅，於最後10日餵飼穀物和牛奶，皮膚雪白。（查詢：25062888）
崇光Freshmart特色走地雞
除了鮮雞外，店內約有6至10款全雞出售，當中獲美國QAI認證的急凍有機全雞，以有機飼料及地下天然水餵飼。（查詢：28338338）
一田土產有機雞
一田百貨超市則有來自中國的有機穗香雞，此雞飲用高山礦泉水，以米糠及玉米為食糧，無添加激素，為中國有機產品認證。（查詢：26941111）
怪師傅：嘉美雞白切最正
今次特地請怪師傅教大家煮靚雞妙法。「冰鮮雞肉味不及鮮雞，最啱爆炒好似醬爆豉椒雞。急凍雞解凍後水份流失肉質較散，宜以濃味去掩蓋雪藏味，好似栗子燜雞。」鮮雞白切最好？「唔一定，嘉美雞肉瘦夠雞味，但因脂肪少唔可以煮太耐，可以做白切雞或海南雞。泰安雞皮爽肉滑唔肥膩，雞味濃郁，適宜清蒸或做豉油雞。至於清遠雞較瘦同細隻，唔太實又唔太腍，蒸炒煮炸乜都得。」
