維園阿哥馬草泥喺網上動員，呼籲一眾兄弟噚日出席《城市論壇》，同班維園阿伯就功能組別存廢議題激辯。噚日現場所現，一班80後為主嘅維園阿哥開壇半個鐘頭前已到場，坐滿右排廿幾三十個現場觀眾位。一班維園阿伯亦唔嘢小，一啲平日唔多現身嘅維園阿伯亦有出現。直播未開始，雙方已嗌交嗌足半粒鐘，要主持謝志峰調停，仲要開咪頒佈三項江湖規矩：唔准人身攻擊、唔好講粗口同動口不動手。
有維園阿伯不滿有80後着住民建聯「無恥」Tee，維園阿哥就反駁，維園阿伯成日鬧民主派反中亂港，「點解唔可以講民建聯最無恥？」謝志峰見雙方嗌到面紅耳熱，強調主持時一定好公平，要求大家冷靜。有維園阿伯唔順氣，不滿謝志峰同班80後飲茶，呢位阿伯聽落散發濃烈嘅醋酸味，明顯呷謝志峰唔同佢哋飲茶嘅乾醋。
約維園阿伯飲茶
謝志峰好厚道咁以退為進，叫大家講嘢時要畀啲良心，話每次都有叫埋班維園阿伯一齊飲茶，班維園阿哥噚日仲即時講埋個酒樓地址叫阿伯出席。到最後班阿伯都係冇人去。
雖然維園阿伯玩杯葛，謝志峰就度到條好橋，隨時可以歷史性撮合到兩班人士擺疑似「和頭酒」，皆因《城市論壇》嚟緊就到30周年，謝志峰暫定5月尾，喺《城市論壇》開壇前，先搞慶祝儀式，希望到場無論維園阿伯定維園阿哥，都可以和和氣氣到場飲杯水酒，以和為貴。
主持經驗豐富嘅謝志峰，噚日主持節目時不忘搞gag緩和氣氛，包括叫上次向張宇人掟廿元紙幣嘅80後，記住今次唔好留低錢，否則佢唔理任何留錢者動機，「惟有報警處理」，笑死班80後。對不滿《城市論壇》單張印有五區公投嘅維園阿伯，謝就解釋字眼已經框住咗，凸顯係個別政黨嘅講法，「唔通叫六區公投咩？」令到班阿伯怒氣平息不少。
謝志峰話，《城市論壇》越嚟越熱鬧係好事，亦反映社會有兩股對立面相當強嘅深層次矛盾，特區政府好應該深思，諗吓應該點處理。
mailto:[email protected]