呢個生滿青苔嘅大衰，咪係《天空之城》入面嘅角色？錯晒，呢齣戲當然同宮崎駿無關，但同為神級漫畫大師，佢就係手塚治虫！而呢位頭尖尖嘅細路仔，之咪係阿童木囉！今次新返Blu-ray仲收錄咗《阿童木》嘅製作特輯與歷史回顧，最抵死係教埋你Gel阿童木髮型，學嘢喇！
記者：陳國輝
質感唔強表情生硬
好多人可能會問：點解票房差成咁，係咪好爛？老實講，故事劇本唔錯，有文、有武仲玩埋溫情，作為卡通片，絕對係一家大細禮拜必睇嘅電影！但身為3D電影，觀眾難免會將佢同Pixal動畫作一比較，首先想講吓質感，全高清呈現之下，例如那疑似《天空之城》機械人嘅金屬殼、人類嘅毛冷及服飾紋理等，通通唔夠真實；再者，人物面部表情好生硬，有時似笑非笑，似哭非哭，當然，純粹從香港3D技術來睇呢套動畫，其實已經勁到爆！
4Steps教你Gel頭
劇情講乜，大家不妨自己買返去睇，但值得一提係隨碟收錄嘅Bonus，絕對可滿足呢班《阿童木》Fans！除咗介紹動畫製作流程，仲會回顧幾十年前嘅原著漫畫，甚至手塚治虫嘅手稿，呢一部份已經夠經典；而入面仲特別為小朋友炮製一輯「小飛俠髮型教學」，例如點樣Gel個阿童木髮型，Bonus就花咗幾分鐘去教大家，有埋真人示範，話一學就識；當然，喺Pixal影碟經常出現嘅短篇動畫，Bonus內亦有收錄自家作品，加埋長達30分鐘，幾抵睇o架！
Profile
畫面：2.35:1
聲效：廣東話/英語DTS-HDMA5.1、DolbyDigital5.1
特別收錄：巨星配音實況、全新短片、小飛俠髮型教學、小飛俠誕生、大都會設計大解構、圖片集
