得「維園阿哥」活化嘅香港電台節目《城市論壇》，成為現時最爆論政節目，早前「豬嘴男」成功狙擊張宇人，令「張廿蚊」名留青史；幾個月前陳克勤遇上「飛bra男」，隨時驚到家。今日星期日又係「維園阿哥」出動日子，網名「馬草泥」嘅任亮憲幾日前已在網上呼籲兄弟今日早啲到，佔據有利位置把握機會出擊。
馬草泥咁緊張，因為《城市論壇》今日討論「功能組別存與廢，政制發展怎向前」，四個嘉賓分別係工程界議員何鍾泰、批發零售界議員方剛、終極普選聯盟召集人馮偉華同五區公投運動副發言人陳家洛，個個都係惹火尤物，如此盛會，豈可錯過！
唔透露準備乜嘢道具
馬草泥話初步估計有廿幾三十個兄弟到場，由於現場觀眾席座位先到先得，所以佢哋今日會早啲到場排隊，「論壇中午12點開始，平時早15分鐘到場，今日可能要提早半個鐘頭。」繼飛bra同廿蚊紙後，「維園阿哥」今日又有乜嘢道具呢？佢噚日不允透露，話仲未決定，總之如果有搞作，肯定唔會令大家失望。
舉行《城市論壇》嘅維園凉亭，大約可坐70至80個現場觀眾，監製兼主持謝志峰話，如果真係好多市民想入場，只要不妨礙攝影機操作，可以彈性安排企位，最多可以容納100人左右，佢印象中幾年前討論兩鐵合併時，由於民意沸騰，好多人到場，企位都逼到爆棚。
政黨求安排到場學嘢
謝志峰又話《城市論壇》歡迎市民參加，不論是否「維園阿哥」，只要以事論事、言之有理都來者不拒，會公平安排大家發言，因此「維園阿哥」吹雞又好，維園阿伯呼朋喚友都冇所謂，「如果你講來講去三幅被，我梗係唔畀你浪費觀眾時間啦。」
家陣《城市論壇》炙手可熱，八方聽聞有政黨公關部向港台敲門，提議畀第二、三梯隊到場學吓嘢，由於佢哋未夠班上台做嘉賓，喺台下發言都好，也可講述政黨立場，唔使一味捱打。
mailto:[email protected]