左丁山最近流鼻血，流血不止，足足一個小時，先至搵到耳鼻喉專科醫生，專家即是專家，不慌不忙，先與左丁山照鼻，繼而電鼻，好快就止咗血，但原來胃內有好多瘀血，醫生話血液不能消化，最好嘔出嚟，以免頂住頂住，話都冇咁快，左丁山血氣上湧，大力一咳，血即湧出，嘔出一飯碗咁多，幾嚇人。醫生話以前老人家教落嗰套止血方法（即左丁山識得嗰種），係仰高頭，用手指夾鼻樑中部，係錯嘅，止血正確手法係頭向下，手指夾住鼻孔兩旁，讓鼻血自鼻孔及口部流出嚟，最好有個杯或碗放在口下面，載住啲流血，咁樣就唔會將啲血倒流入胃，造成心胸滯悶。現在科技儀器先進，將個鼻掃描，相片在螢光幕顯露出嚟，睇得一清二楚，醫生話冇嘢要驚嘅，只係流血過多，如果身輕頭暈，就可能入醫院吊鹽水。
跟住肥仔K話頸痛，不能顧盼自如，懷疑打機過多或者睡姿不正確，想話搵止痛藥膏嚟貼吓。貼乜鬼吖，立即去睇自細睇到佢大嘅家庭醫生，醫生話頸痛未必與頸部有關，照吓耳仔先，一照就發現耳仔發炎，內有水漬。可能係呢排游水游得多，池水入耳都唔知，冇耳炎就唔會頸痛喇，食止痛餅與貼藥膏，完全冇用。
又有咁啱嘅，坐的士時，的士司機聽到，立即說出佢的耳痛故事，佢話頭痛頸痛，痛咗一個月，猛食「必理痛」，完全無效，食中藥亦無效，卒之去睇西醫，西醫又係首先同佢照耳仔，一照立即叫司機去搵專科醫生，佢唔識畀藥。司機雖則怕耳科專家收費高，但迫於無奈，去睇專科，專科醫生用先進儀器掃描，叫司機睇番照片，一睇就嚇親，原來耳內滿佈霉菌，十分恐怖。細菌何來呀？講咗好耐，醫生話司機長期戴住耳塞聽電話，每日十小時以上，而耳塞長期在的士上擺放隨時沾上細菌，若弄濕了耳朵，耳塞上之細菌在耳朵內滋生，一啲都唔奇，醫生在公立醫院內見過病人耳仔內有雲耳生出嚟㖭！醫生同的士司機嘅耳仔消毒，清除霉菌，食藥之後，司機話冇晒頭痛頸痛咯。聽佢一講，如果我哋長期用耳塞聽iPod、MP3，亦有可能發生同樣事情噃，急忙向肥仔K示警，戴耳塞要注意清潔消毒。