兒童節唔好令小朋友唔開心，所以今日都係帶細路去慶祝吓好啲，獨留兒童在家隨時發生慘劇，民建聯陳克勤6、7歲時，差啲因為冇大人睇住而冇命。
陳克勤指當年佢父母都要出外工作，屋企成日只有佢一個人，有一日百無聊賴，忽然手痕想為就快放工返屋企嘅父母煮飯，從無下廚經驗嘅佢竟然真係膽粗粗咁走入廚房開火，雞手鴨腳終於失火，好彩鄰居見到佢屋企冒煙報警，冇任何損傷。
呢餐飯煮唔成，小克勤卻飽嚐父母聯手炮製嘅一大鑊藤條炆豬肉，回味至今。自此克勤唔敢亂入廚房，改為偷走出走廊同其他小朋友玩捉迷藏，後來佢獲贈一架單車，喺走廊飛車，好過入廚房搞搞震。