復活節除咗行街睇戲之外,仲有乜好搞作。菜聯社老友email提醒小妹,記住今日去大埔墟趁墟。佢話為慶祝農墟五周年,今個月一連四個周日喺大埔太和路(大埔消防局側)舉行大型農墟,由朝早9點至傍晚5點。今次農墟賣點就係由農友即場教巿民喺大廈單位用花盆種有機蔬菜,好似女仔最愛嘅青瓜、士多啤梨、車厘茄都種到。
喺屋企種車厘茄,又幾啱我哋啲港女喎,食咗可以抗衰老,但係難唔難種o架?香港有機果蔬農莊、觀光士多啤梨園園主林包洪大大聲話,上樓用花盆種車厘茄,話都冇咁易,最緊要你有冇心機種啫,「喺屋企自己種,自己食,梗係開心過喺街買嚟食。」
林伯話,4月最啱種係車厘茄,買一顆車厘茄苗只係10蚊,記住要用一呎直徑嘅花盆先夠空間種,每日施肥(有機肥)同淋水,大約70日有得食,一盆種一顆車厘茄苗大約可以種到四、五斤車厘茄,種兩盆就夠一家四口食,「嚟到農墟,有苗、有盆、有肥料賣,即場仲會教埋你點種嘅。」佢又話,士多啤梨都好啱喺屋企用盆種,不過家唔啱時候,要10月天氣較凍嗰陣種先得。
菜聯社老友話,現場仲搵埋曾任大廚嘅有機農民以當造嘅有機菜,即場示範有機菜煮食,煮完就分畀市民食;又設攤位遊戲贏取「有機種植包」。有得食有得玩,玩番半日都唔錯噃。
電郵:mailto:[email protected]