蘇富比噚日喺會展舉行春季紅酒拍賣會，賣嘅都係好受歡迎嘅柏翠堡、拉斐堡、拉圖堡等名貴紅酒，有買家一擲千金用百幾萬元買入12支標準裝1995年柏翠堡共8箱。拍賣成績咁好，拍賣官手起槌落越扑越興奮，拍賣1995年柏翠堡3升裝時，最後出價至14萬元，拍賣官大力一扑宣佈成交，可能實在太肉緊，出盡力一扑之下，槌仔應聲斷裂，全場人爆笑，令流水式拍賣會添加搞笑氣氛。
拍賣會扑爛槌仔真係百年一遇，八方聞所未聞，相信蘇富比都冇乜同樣經驗，因此冇預備後備槌仔頂上，不過拍賣官反應快曉執生，拎住個槌仔頭照扑，一有成交就好似蓋印仔咁用槌仔頭敲落枱面，原來分別唔大，手起槌落，如常成交。