社民連季詩傑流年不利，半年內兩遭血光之災，好彩今次傷勢唔嚴重，好多朋友都祝佢早日康復，笑言佢個頭未必硬得過白鴿黨何俊仁，再被人扑後果難料。
心無雜念頭腦特別醒
阿季上次受傷入院，百無聊賴度咗兩條波纜皆中，帶挈朋友贏錢，事後佢話只係撞彩，因為留醫時心無雜念，頭腦特別清醒，專心睇波經所以有收穫，平時俗務纏身，反而冇咁心水清。噚日傳出佢入院消息後，朋友同佢苦中作樂，喺facebook留言問佢有冇心水推介，希望佢有所寄託，暫忘被襲陰影。
噚晚重頭戲碼係曼聯對車路士，阿季係車仔迷，紅魔首席射手朗尼缺陣，車仔旗開得勝，阿季飲得杯落啦。佢仲喺fb透露睇緊《戰爭魔術師》（TheWarMagician）。呢本書以二戰北非戰場做背景，講述主角放棄魔術表演舞台加入英軍，利用魔術欺瞞敵軍，做幕後軍師立下重大戰功，阿季病中精讀兵不厭詐之術，唔知有甚麼體會，有甚麼心得？