夠Car事：全車拉燈　薯嘜變艷星

做人總係貪新鮮，就算幾潮幾勁嘅車，玩耐咗總有啲悶悶哋，雖然座駕都可以如衣服，換過一架，乜嘢新鮮感都返晒嚟，不過原來唔使換車都有計！就好似呢位仁兄咁，將架車拉晒燈飾，一着燈就即時閃通街，有新鮮感之餘，仲幫你賺埋途人目光，滿足埋虛榮感，都係所費無幾，仲使乜下下要換車！

記者：趙慧敏
攝影：王文忠
Model：Norain@PureModels

「人不可以貌相」，車都係咁話！呢架本田房車，佢日光日白嗰陣喺街度行，肯定平凡到你連眼尾都未必會為佢動一下，但一到夜幕低垂，佢就如艷星般光芒四射，絕對有萬眾矚目嘅本事。事關佢全車內外都裝上咗LED燈飾，着晒燈時，整部車泛起又藍又白又黃嘅燈光，充滿科幻感，簡直令你以為有UFO降落地面。

■全車泛起藍白燈光，科幻味十足。

騰雲駕霧UFO

令全車又搶又爆，其實全靠一條條軟身LED燈飾條嘅幫助，不過都要識得玩至玩得靚。呢部「本田UFO」就玩得夠全面徹底，首先車頭大燈上就以燈條自製出一條燈眉，當堂令「雙眼」明亮又神氣，一副戰鬥格即時出現。不過我覺得最搶鏡嘅，就要打開車門先睇到，一開門車身兩邊裙腳底會即刻亮燈，藍光由車頭伸延至車尾，更加反映喺地面上，令人有全車凌空騰雲駕霧嘅錯覺。至於側鏡，原裝並沒有設置指揮燈，但車主就能利用LED燈條，自製指揮燈號，似乎要話畀人知，玩燈唔係剩係貪靚，仲好有實用性㖭。所謂好頭好尾，車尾又點會忽視。點睛位係整色整水、裝喺車尾底部嘅一條白色嘅LED煞車燈，搶爆，跟尾嘅車肯定唔會盲巫咁撞埋嚟啦！

■打開行李箱，一樣閃到令人嘩嘩聲。

■側鏡底加裝指揮燈，同裙腳燈齊齊鬥搶。

■車頭氣壩都有LED燈裝飾。

■頭上加LED燈眉，盡收點睛之效。

收埋閃

外觀夠晒爆，原來收埋收埋嘅都唔少。內櫳就梗係有花心思啦。開車門一刻，除咗車底發光，門邊嘅藍光燈條都即時收奪目之效，老實講，搶眼程度比豪華房車級門燈有過之而無不及。當你懷疑單一藍光會唔會有啲單調之際，竟然發現又可以玩埋撞色，駕駛座腳踏位置同前座乘客位置就用上橙紅色燈條配襯，好明顯，紅光唔係主色調，但襯起藍光上嚟，確實幾好睇。不過真係無諗過車主連行李箱裏面都唔放過，裝上一條可以照明嘅燈條，仲連音響都有埋閃燈，貫徹爆燈效果。一架原來平平無奇嘅日本車仔，就係咁，變得出眾過人。