愚人節過咗幾日，但係社民連陳偉業噚日先過愚人節。話說「大嚿」約咗五個YogaYoga苦主噚日去荃灣警署集體報警，點知五個人集體甩底，愚人節過咗幾日先整蠱佢。大嚿仲約記者去採訪，點知俾人放飛機，場面有幾尷尬，可以想像。
大嚿被玩，苦主都唔精明，大嚿話其實1月尾已收到荃灣居民投訴荃灣嘅YogaYoga唔多妥，佢喺2月初兩次去信荃灣區指揮官要求調查事件，警方3月初覆稱證據不足，唔會採取任何行動，說時遲那時快，幾個星期後YogaYoga就拉閘，大嚿批評警方處理失當。佢共收到十幾單投訴，幾個苦主2月初已入稟小額錢債審裁處追討，家YogaYoga執笠，恐怕苦主啲錢都凍過水。