周五26/03
買波膽記住平常心
喜玩波膽者，多抱平常心下注。做人有時其實毋須太執着，天天黑面咪又係要生活。好友牛一，自要畀面出席多年來未去過嘅卡拉OK派對；回到家，跟自己貼士買例飛50蚊波膽過關竟收1,200蚊，事前全冇想過會中到正，上到榜首咯！
閒贏指數：☆☆
周六27/03
心情差下注倒錢落海
冇恃旺下注，上半段日聯+英冠過關，重心侯城單W劫「富」也中，可惜阿仙奴臨尾香，贏一千幾百又如何？心情轉壞，博保頓及馬略卡大冷當然失手；最要命係AZ[-1]失手。奉勸大家，心情唔好千祈咪胡亂下注，好易出事！
閒贏指數：☆☆☆
周日28/03
忽然對自己要求高
一早講賭波膽要抱平常心，全日重心燕豪芬[-1]中到應，點知個4:1完場前十多分鐘爆了開4:2，好失望！對自己要求過高，定係心態有變，自己心中有數。近排深夜睇咗好多西甲，好彩剛轉夏令，冇咁痛苦。
閒贏指數：☆☆☆
周一29/03
賭隔夜飛點都着數
北歐波留番世界盃後先刨，全日所有注碼側重曼城及紐記最終得手；但發現唔少波友鍾意賭定早飛，曼聯隔夜已轉讓波，不計贏輸，熱門早買其實係着數啲；相反博冷，要有耐性。再貼中曼城3:0波膽。
閒贏指數：☆☆☆☆
周二30/03
中拜仁波膽最無厘頭
屋企冇「畸寶」，要我選擇出去約好友睇歐聯，一定留番明天阿仙奴對巴塞，呢晚都係瞓陣先然後上網。貼咗拜仁贏2:1，只係小注怡情，但場波其實幾悶，拜仁根本迫唔到曼聯出真功夫，但最後又無厘頭中波膽；只要球證吹早十多秒完場，這個世界便不一樣，所以如無必要我唔鍾意買走地盤，戰情千變萬化，又唔係瞓身，何須瞓唔安食唔落，又要補注又要對冲？
閒贏指數：☆☆☆☆
周三31/03
快樂足球人生何求
愚人節對我來說由周三晚提早開始，貼八鯨贏波兼2:1波膽，補時到最後1分鐘爆咗，成為失榜首關鍵1分鐘；戰友牽牛卻靠阿仙奴絕境下完場前扳和射國米[-1]和，反先我數百分封王3月。哈哈，人生就係咁，反輸畀佢我服，更服係阿仙奴咁都追得和，條氣點會唔順呀。哈哈，畢竟，我們睇波還是賭波，都係快樂足球！
閒贏指數：☆☆☆
周四01/04
唔信3月旺氣消失
歐霸盃形勢緊湊，我唔信3月旺足下半個月會喺4月會斷；但一向睇唔通呢個盃，只小注漢堡炒標準列治，可惜中單W咋。
閒贏指數：☆☆☆
上周備忘球隊：
名古屋鯨魚、浦和紅鑽（周中踢盃仔唔贏，返聯賽主場好着數）