三十八歲才出櫃，嫌不嫌太遲？唔遲，唔遲，一啲都唔遲，保守估計你活到八十歲乘鶴仙遊，都仲有半世人可以公然搞基，雖然浪拋了青春，到底比六十五歲才昂然承認「我係」強得多。不過年齡從來不是出櫃關鍵，勢利的社會為所有人都定下了賞味限期，一踏上「誰在乎」的不歸路，真的冇謂搞到咁隆重，求求其其在衣櫃裏繼續混下去算了，鬼鬼祟祟暗渡陳倉不是很激嗎，不要以為自己是新撕蘿蔔皮，全世界屏息靜氣等你坦誠佈公。譬如說，湯告魯斯，又或者說，費玉清，要是忽然挺起胸膛承認喜好男色，引起的恐怕只有不耐煩的噓聲吧？而陳志雲，最近有人順口問起，答案已經滑落至「最好佢唔係，費事畀佢陀衰家」的悽慘田地，問你驚唔驚？
所以講到底，我還是覺得向社會公開性取向這種行動，和保養皮膚一樣，屬於「行得快好世界」範疇，早做早着事不宜遲。有潔癖的圈外人不管肯不肯面對肉騰騰的春宮圖都好，也必須瞭解所謂同性戀，並非穿件時裝拖住心上人去三星飯店飲飲食食那麼簡單，開波這種情節，是套餐的一部份。老柴固然有擦出火的可能，幾廿歲人開展光明新生活也令人羨慕，但萬一去到身體力行那一步，機件突然故障，得來不易的自由身周轉不靈，豈不大煞風景？
況且，少了一隻痛腳，生活無論如何都應該較為輕鬆愉快吧？收收埋埋的秘密越來越多，整整下自己也糊塗了，消息靈通的記者上門向你求證是否某年某月在美國娶老婆，面紅耳赤的你爆出一句「我同羅密歐冇景轟」，人家都不知道要不要原文照錄。