家好多潮人都用緊iPhone（圖），小妹都係一分子，最鍾意一路聽歌一路上網或者打機，隨時一日唔夠就冇電，周時要中途充電，但係我有啲本港同台灣朋友都試過，喺充緊電嘅時候傾電話，其間無端端俾iPhone電親塊臉，雖然無表面傷痕，只係覺得麻麻痹痹，不過都唔知係咪輻射嚟嘅，好擔心影響到白滑皮膚，你知我哋女士一個月用好多錢去護膚o架啦。
小妹問過大專院校嘅教授，佢話雖然手提電話唔似插蘇咁，有所謂「地線」防漏電，但係正常嚟講，電話唔應該漏電，出現被電親嘅情況，有可能係靜電引致，同電磁輻射有關，亦可能係個別電話內裏機件線路接駁唔好引起。
教授話唔只iPhone，其實用乜嘢手提電話都好，一向建議唔好充電嗰陣講電話，發短訊或者打機都唔好，因為充電嘅時候一路有電流入去電話內，有一定風險，如果充電器本身有問題，仲有爆炸着火危險。小妹即刻話iPhone成日冇電喎，咁點算？教授話要傾電話應先掹咗充電器嘅連接，或者用免提耳機，而最理想當然係熄咗機先充電。
小妹查吓機電工程署網頁，署方仲建議電池充電時間唔可以太長，要跟番說明書嘅規限，仲要避免喺冇人在家或者瞓覺時充電，充完電亦唔好駁住電源唔掹掣。唔少手機討論區都有列出溫馨提示，話鋰電電池含有易燃物，充電嗰陣電話千奇唔好放喺太陽照射到或者高溫環境，以免着火，咁我以後充電都要小心啲。
電郵：mailto:[email protected]