前排引發一陣保育風雲嘅永利街，喺市建局宣佈保留之後，爭議平息，成條街靜晒，得番啲龍友間唔中去亂影一餐，收樓呢單嘢好似從未發生過一樣。
但係關注開永利街呢單嘢嘅朋友同八方講，永利街風波仲未完，佢哋擔心，市建局所謂原汁原味嘅保育方案，其實另有目的，焗班業主低價賣樓，兼夾將重建面積轉移到史丹頓街，大發保育財。
市建局未放棄地盤
朋友轉達永利街一名小業主嘅心聲話，自從林鄭月娥（發展局局長）好偉大咁自稱為民請命、自從張震遠（市建局主席）好頓悟咁話要保育永利街之後，佢到家都寢食不安。點解呢？呢位小業主擁有由地舖至三樓嘅全棟物業，起初市建局開出1,000萬收購價，小業主覺得起碼值1,500萬，冇接受。
去到上月中，市建局宣佈保留永利街。張震遠聲稱，唔再積極收購永利街，又話將永利街剔出重建範圍，搞到大家都一廂情願，以為永利街真係會永久留番畀原來嘅小業主。心水清嘅朋友話，市建局根本從未放棄過永利街呢個地盤，亦都從未放棄過全盤收購所有業權。永利街嘅價值，唔在於甚麼街坊互助嘅舊社會精神，而係在於可以轉移到H19重建項目之下嘅同區地盤。
八方喺度嘗試解釋一下，自從市建局公佈保留永利街一刻起，永利街小業主就失去議價能力，若干時月之後，市建局重提收購，小業主就會飯應。咁樣市建局就可以賤價吞併永利街，然後利用永利街嘅可重建樓面面積，轉移到附近嘅史丹頓街。如此一來，市建局既可以保育鬥士自居，又可以發重建財，一舉兩得。
朋友話，小業主家陣冇嘢可以做，只能夠默默畀歲月神偷張震遠偷走佢哋嘅議價能力。朋友盛讚張震遠呢招既唔會得罪廣大保育團體，又可以保住巨大重建利益，他朝一戰功成，絕對可以記入香港重建史。
還看史丹頓街業主
不過，市建局最終能否得逞，仲要問過史丹頓街嘅業主同埋法庭。事關嗰邊有業主已經表明，唔會接受市建局收樓重建，如果政府強行收樓，就會申請司法覆核，抗爭到底。
mailto:[email protected]