一條撞車嘅短片喺YouTube上載一星期，點擊率衝破17萬，勇奪本星期瀏覽人數冠軍！咁離譜嘅情況可以清楚展現大家眼前，全靠裝喺汽車上嘅鏡頭。呢類兼備錄影功能嘅汽車「黑盒」，除可以影到瘋狂司機嘅罪證，亦可以喺必要時保障自己。不過唔少人對汽車「黑盒」一知半解，點用？會唔會犯法？影片可否呈堂？一次過話你知！
記者：許維雅
攝影：梁細權、陳陶鈞
Model：Sansu@Puremodels
最全能個人化 目擊者
來自台灣嘅「目擊者」已經推出第二代，備有廣角鏡及Zoom鏡各一支嘅倒後鏡已經係兼有錄影功能嘅汽車「黑盒」。倒後鏡右邊有一個3.5吋LCD畫面可以睇到即時行車情況或Playback，所以唔少人喜歡加裝車尾鏡作倒後泊車鏡頭用途。價錢屬於較貴嘅款式，功能固然特別多，如可以即時設定多個不同錄影及顯示模式，光暗調校、錄音及螢光幕開關等等，最多可同時裝5支鏡頭，兼錄4支鏡頭畫面，而代理更會因應車主需要作不同嘅個人化設定，如教車師傅可要求鏡頭錄影兩邊輪胎以方便學生溫習、打指揮燈可出現車側全畫面等，當然越複雜收費相對越貴。
安裝步驟：
1.只要將「黑盒」套上原有倒後鏡上便可。
2.12V插頭一插即用，亦可加少少錢將電源接駁匙火，撻車即着。
3.記憶卡插入頂部卡槽，2GB可作兩小時循環錄影，不過鏡頭越多時間越短。
4.左軚車版本螢幕設於左邊，可同時播出四畫面或自行設定單一畫面。
睇片
最輕便資料齊 車路視
市面上大部份質素較好嘅汽車「黑盒」都來自韓國或台灣，車路視就屬韓國佳作，特點係會利用GPS衞星定位紀錄所有行車實況，包括時間、地點及車速，更有G-Force感應器紀錄衝擊數據，即係你架車點入彎都一目了然，資料齊全。據記者實試，車路視出隧道後追回GPS訊號毋須1分鐘。缺點係所有Menu設定都要喺電腦入面選擇，不過輕便簡單唔影響原裝倒後鏡亦係賣點之一，最重要係較經濟。男士可能擔心女友檢查行車紀錄，車路視可調校Event模式，攝錄影像只會記低事發時前後嘅片段，咁就唔怕女友侵犯你私隱啦。
比較真實畫面及電腦影像，130萬像素CMOS畫面的確係較流暢及清晰。
安裝步驟：
1.貼上透明膠殼於車頭玻璃正中，倒後鏡後面嘅位置最佳。
2.將車路視套入膠殼再上螺絲，於底部插入記憶卡，駁上電源立刻用得。
其他推介：
VIEW-i
外形較討好，備有前後雙鏡頭選擇，有GPS接收紀錄。
售價：$1,980 雙鏡頭$2,480/b
（連2GBSD記憶卡/連匙火安裝加$200）
RoadEYE
韓國製，同樣有GPS追蹤及G-Force紀錄。
售價：$1,980/d
（連2GBSD記憶卡）
VOSONIC
台灣出品，兼有小螢幕輸出畫面，只要夾於太陽擋便可使用，記憶卡最高兼容32GB。
售價：$1,399/c
（無記憶卡）
XDRIVEN
屬早期韓國出品，同樣有GPS追蹤及G-Force紀錄。
售價：$2,300/d
（連1GBSD記憶卡）
汽車「黑盒」通識
有權拒絕交片
可能有好多人對於車頭裝鏡頭係咪侵犯私隱感到含糊，諮詢過黃國桐律師意見，佢話鏡頭只係影住行車情況，不停移動，非針對單一目標，唔算侵犯私隱，但就要小心唔好侵犯到人哋車廂內嘅情況。其次，「黑盒」所拍攝到嘅影片亦可作舉證用途，不過影片嘅可信性有幾強就有好多其他因素影響。最後，可能有人會擔心裝鏡頭十分「捉蟲」，萬一係自己錯而被迫交出影片反篤自己，咁咪好唔抵？放心！黃律師話「黑盒」係你私人財產，你有權拒絕交出影片畀任何人。
查詢：
a/宏安電訊（35912211）
b/GalaGold（27989511）
c/台日汽車用品公司（23924244）
d/偉良汽車配件中心（23842464）