人生就如玩大富翁。郭春光師傅後生時試過一夜賭輸三年人工，為還債返大陸白做三年；谷底逢生，那年又給他認識到現任太太給予扶持。他有總廚唔做，毅然轉行做食品「Sell屎佬」；廿年人事翻幾番，今年終於復活，一擲百萬開菜館做老闆，他說：「這一鋪不容有失。」
記者：趙珮倩
攝影：梁細權
場地：龍鳳廚坊（23800046）
一夜賭輸三年人工
郭春光師傅入行超過32年，曾在中國西麗酒店餐飲部任總廚、廣州南海漁村任副總廚及富臨漁港集團任大廚。11歲跟阿爸晚晚推車仔賣潮州蠔餅，賺埋都不夠交擺街的罰款。幾年後阿爸過身，郭師傅到酒樓當學徒，做過「上什」（發浸食材）、「砧板」（切材料）、「打河」（負責分配柯打工作）、「將軍」（負責煮員工饍食），廚房裏每個崗位都經歷過浸淫過，穩打穩紮。
曾有段時間，郭師傅喜歡賭兩手，某次竟一夜間輸掉三年薪水，那時一年人工只有七千，於是經友人介紹到深圳做開荒牛，「香港人返大陸打工，人工比較好，都是做些廚房管理和品質監控工作，包食包住唔使點用錢，白白做了三年才還清賭債。」那三年的最大得着，除戒賭外，還認識現時老婆，「第一晚到埗，宿舍甚麼都沒有，只得一個枕頭和一張蓆，她見到我新來便幫我買被鋪，就這樣認識。」
鍾情廚房工作
做過酒店總廚、又出過書教人煮餸、更試過拿着一箱箱食品到食肆行銷，可是郭師傅還是鍾情埋首於廚房工作，個多月前在深水埗開了一間菜館叫龍鳳廚坊，早午兼賣點心、晚市親自主理潮州及客家菜，還記得他11歲便曉煎蠔餅賣嗎？「自己是潮州人，當然要將正宗潮州菜帶給大家，現時最希望舖頭盡快上軌，收支平衡就好了。」
客家碌鵝
1hr30min
份量：4人
製作難度：★★★★☆
碌鵝是傳統的客家名菜，將肉厚而鬆化的獅頭鵝放入香濃醬料中烹調，不時翻動鵝身，碌來碌去，令其均勻上色入味，因而取名「碌鵝」。
材料
獅頭鵝1隻、蒜頭120克、乾葱100克
醬料：生抽450毫升、南乳150克、磨豉醬75克、米酒230毫升、糖230克
做法
1.開大火燒熱鑊，爆香蒜頭及乾葱，下鵝煎封全隻表面。
2.將醬料拌勻，倒入（1）中，煮滾後收細火，冚蓋煮30分鐘。
3.將鵝身反轉，冚蓋再煮30分鐘，其間要不時翻動鵝身及將汁料淋上面，直至全隻鵝均勻上色，熄火後待汁料攤凉，切件上碟。
貼士
可以體形較小的鴨代替獅頭鵝，煮起來較易控制。
香煎芋烙
0hr35min
份量：4人
製作難度：★★★☆☆
潮州人喜歡吃芋頭，以它來做甜品，更有解膩之效。
材料
芋頭80克（切粒）、糖50克、番薯粉80克、糯米粉30克、水180毫升、花生碎/芝麻碎各少許
做法
1.燒滾水，將芋頭粒放入鑊隔水蒸20分鐘。
2.將糖、番薯粉及糯米粉拌勻，倒入水拌勻成粉漿。
3.將粉漿倒入易潔鑊，開細火，下芋頭粒、花生碎及芝麻碎，煎至一面金黃後，反轉煎另一面，邊煎邊壓平至兩面金黃色即可。
潮州蠔餅
0hr20min
份量：4人
製作難度：★★★☆☆
師傅用鴨蛋煎蠔仔餅是正宗做法，比起用雞蛋煎出來香口鬆化好幾倍，吃時蘸上魚露或豆瓣醬，風味十足。
材料
蠔仔200克、番薯粉75克、自發粉30克、鴨蛋2隻、鹽1/4茶匙、五香粉/胡椒粉各少許、葱花/芫荽碎各適量
做法
1.將蠔仔洗淨，揀走殼碎，瀝乾水，下鹽、葱花、胡椒粉及五香粉拌勻。
2.將自發粉和番薯粉拌勻，倒入蠔仔中拌勻，邊攪邊加入1隻鴨蛋拌勻。
3.開中火燒熱鑊下油，下（２）煎成餅形，沿餅邊倒入1隻鴨蛋漿，反轉煎另一面，待兩面金黃即可上碟，放上芫荽碎做裝飾即成。
