【絕世奇花1945-2010】奇女子狄娜大前日因身體功能衰竭去世，享年65歲。昨日岑建勳接受商台電話訪問時，提及早於74年已認識狄娜，二人曾暢談有關社運、學運及共產黨的話題，他指狄娜好學不倦，是一個有風度、雍容及淡淡定定的人，不過對政治的見解仍是一個入門漢，只了解當中皮毛，故不會當她是一個中國問題專家來展開討論。
七十年代活躍參與社運的岑建勳，原來早於74年已認識狄娜，兩人更多番暢談政治，昨日他接受商台節目電話訪問時，透露74年經由《成報》前總編輯韓中旋作中間人，帶他與另一社運分子吳仲賢到狄娜家作客，他說：「當時韓中旋話狄娜想搵我哋兩個傾偈，我覺得好奇怪，我知佢係邊位，佢係演藝界，我就唔係。」
「佢仲係一個入門漢」
岑建勳續說：「我哋就去跑馬地司徒拔道狄娜嘅豪宅，我哋兩個係窮小子，呢個人好豪華，佢同我哋講社運？狄娜一坐低就講共產黨宣言，當時我唔係睇唔起，喺心入邊有啲笑，呢位女子講一啲我哋咁熟悉嘅嘢，講馬克思主義、中國前途看法，當然大家睇法有啲差距。嗰時我哋全力研究呢啲理論問題，狄娜畀我哋感覺係有啲皮毛，唔係話好識，佢係一個好努力想學習嘅人，不過傾完冇乜結果。」
岑建勳指與狄娜見面後，曾問韓中旋為何狄娜想見他們，韓表示狄娜想知道他們的睇法，傾談後他卻不清楚她的看法，只知狄娜十分關心社會問題。
相識36年，岑建勳指狄娜一直是個求知慾十分強的女士，十分留意時事，他說：「佢好好學，我好肯定佢睇好多書，係做足準備先同我哋傾，但仲係一個入門漢，始終業餘研究吓，對問題唔係好到。當時中國仲係四人幫，佢思想傾左，我哋就更左，所以傾完冇乜特別。」
「唔當佢係中國專家」
岑建勳又指狄娜從來不會致電他討論社運問題，他以「性格好強」來形容狄娜，他說：「佢唔識想問嘅話，唔會用請教方式，係用討論方式去吸收學問，佢性格係咁。見到面就會講自己有乜新睇法就即刻會講，佢好注意時事政治，係好勤力嘅人。」
眾所周知狄娜詞鋒銳利，岑建勳則說：「私底下佢唔會咁，無可否認佢諗嘢好快，有時pickup一啲名詞好快就會用，但係咪用得好啱，好多時就唔一定係啦，我會同佢講番社會民主主義唔係咁解o架，其實佢唔係好知。」
兩年前岑建勳與狄娜合作電視節目《大國崛起》，問他覺得狄娜30多年後有何變化？他說：「基本上冇乜，依然都係求知慾好強、好有主見，始終佢有其他生意，唔係全職研究呢類問題嘅人，對中國問題了解唔係好似我哋咁。對我同劉銳紹嚟講，佢有時攞唔到問題中心，我唔會當佢係中國問題專家去討論，會當佢係一個主持人，回應佢嘅問題。」
愛改變他人不同觀點
對於狄娜在其著作《電影──我的荒謬》中自稱後悔接拍艷情片，岑建勳說：「一定會啦，佢性格係唔易講後悔嘅人，有一次閒談佢問我哋係咪覺得佢拍過呢啲戲冇資格講呢啲嘢。我同佢講拍艷情片冇關係，我一定唔會有咁嘅諗法，就算係賣雲吞麪都唔會話冇資格去講。」
岑建勳謂於《大國崛起》中與狄娜的討論算是較深刻的一次，因為當時大家所持的觀點不同，他說：「佢份人好直，有一次有個電台主持搵我同佢，我病咗冇去，之後見面佢就同我講：『我去都係因為你，你又唔喺度，你咁樣係冇禮貌。』我咪同佢講番我唔去得一定有原因，佢份人就係咁personal。」
岑建勳又透露當時《大國崛起》的監製曾有意找命理學家在節目中分析中國命運，他知道後曾拒絕演出，狄娜其後親自打電話給他，他說：「我係講社會科學，用社會科學同歷史角度去分析，我同狄娜講如果有命理學家，咁你哋自己傾啦，最後佢都從善如流，節目上、私底下又好，我哋唔會有火藥味。」不過岑建勳認為狄娜為人執着，喜歡說服別人認同其看法，他說：「觀點唔同真係唔緊要，佢就想去說服我，我曾經同佢講Tina你有你睇法，我會尊重，佢就話見到我嘅睇法係錯誤，佢咁講即係唔尊重我，當時佢立即停一停，後來我同佢講番改變人哋認同自己嘅睇法即係唔尊重。」
憂六四引起香港動盪
原來89年六四民運發生後，狄娜曾透過查小欣再次聯絡岑建勳討論政局，岑建勳說：「嗰晚佢去咗我屋企，講吓對六四嘅睇法，當時佢好怕香港會亂，佢就好緊張，好想講出自己意見，係一個典型嘅狄娜。」
岑建勳又謂與狄娜會面，從不會提及電影。問到若有人投資拍攝有關狄娜生平的電影，哪一個演員勝任飾演狄娜時，岑建勳說：「寫真寫假，寫真有幾多人有資格去講，寫假大家冇興趣去睇，點解要開拍呢套戲呢？」對於狄娜在遺言中提及希望大家只記得她生前的談笑風生，而不是死後的木無表情，與狄娜相交36年的岑建勳表示在他印象中，狄娜永遠都保持一定風度、雍容、淡淡定定，從未見過她氣急敗壞。
撰文：葉雪