《南華早報》最近有猛人加盟，係來自《華爾街日報》嘅澳洲籍女編輯。傳媒個市咁靜局，新人入職本來係好事。但係呢個職位調動喺老牌英文報掀起一幕人事風波。八方接到匿名投訴，不滿《南早》高層聘用過江鳳之前，冇考慮過就地取材，有歧視本地僱員之嫌。
冇法例限定須公開招聘
投訴人話，《南早》年初調走咗一名女編輯之後，一直未有公開招聘填補空缺。有同事想話內部爭逐呢個職位，高層就話佢哋咪使旨意。事隔兩、三個月，高層就請來一位澳洲人坐鎮。報館一陣騷動，有人向入境事務處舉報，不滿僱主未按法定程序聘用外勞。
入境處話唔評論個案，但係佢哋解釋，香港冇法例規定僱主喺聘用外地僱員之前，必須喺本地公開招聘。入境處係會要求僱主證明，喺本地搵唔到符合入職條件嘅僱員，先肯批出工作證畀個外勞，但係呢個唔係法規，只係行政措施。