自由黨副主席張宇人喺最低工資問題上禍從口出，幾乎成為社會公敵，雖然張宇人不代表自由黨，但仍然有市民將廿蚊事件入自由黨數，自由黨主席劉健儀透露，該黨一個區議員近日要求退黨，原因係好多街坊同埋其他政黨嘅地區人士都日鬧夜鬧，佢頂唔順咁大壓力，寧願退黨。
劉健儀對呢位區議員遭遇都深表同情，希望市民明白今次真係唔關自由黨事，呼籲其他黨派口下留情唔好再乘勢抽水。至於蔣世昌退黨參選九龍西，劉健儀回應話：「差唔多唔記得佢係黨友！」無意揣測佢參選原因，但透露自由黨稍後都會傾傾5.16補選投唔投票好，因為有黨員表明希望跟隨黨指示而行。