【本報訊】狄娜是許冠文電影處男作《大軍閥》的拍檔，戲中她以接近全裸的演出震撼全港，許冠文昨日憶述狄娜當年沒收片酬演出該片，拍攝床戲時大方淡定，顯露出她與別不同的氣魄及過人之處：「佢喺嗰個時代已經咁大方，睇得咁通，佢幾前衞同超班，好睇得通呢個世界。除晒衫都可以咁自然好難，嗰陣時我就話呢個女人好勁。」 記者：何永寧
許冠文1972年接拍《大軍閥》，與狄娜結片緣。他昨日接受本報記者電話訪問時憶述，當年狄娜沒收片酬客串演出，臨走時更送贈一塊玉石給導演李翰祥，感激對方賞識，許冠文說：「可以做到咁，好令人佩服，作為女人嚟講係好叻㖭。」
許冠文：好大方演床戲
許冠文說，當年狄娜已顯出與別不同的氣魄及過人之處：「佢嚟客串一個場面，好性感全裸咁滯。全裸嘅時候，我都驚，因為唔係好習慣咁嘅場面，反而佢好大方淡定咁演呢場床上戲。」他表示就算今時今日，很多女主角拍脫戲時也表現戰戰兢兢，跟當年狄娜的表現不可同日而語。
狄娜其後投身商界，由破產到東山再起，都表現一代奇女子本色，這點令許冠文佩服得五體投地：「佢係咁多女主角當中美貌與智慧並重，破咗產之後咁短時間可以再翻身，仲晉身國際商業。」另一點令他欣賞的是狄娜的學術修養，她熟悉時事，有自己獨特的見解，許冠文說：「講到自己嘅想法出嚟，呢種學術修養係好高，啱唔啱一件事，起碼佢有觀點先。我接觸佢嗰時成日都笑，PR好叻，乜人都死，真係雀仔都落樹，佢又溫柔又體貼講說話又叻、又靚，當然好多男士為佢傾倒。」
當年有傳聞指狄娜接到《大》的劇本時，不知道要演出裸露戲，直至當她入到戲棚埋位時，才知被人「捉上轎」。更有說她拍攝後即哭着走，並為此與李翰祥產生嫌隙，狄娜曾解釋說：「我沒有咬牙切齒說李翰祥騙了我，他沒有逼我脫，但劇本的確沒有除衫，令我以為自己都有少少演技，當日我到了片場，他眼也不敢望我。」
龍剛：有思想有智慧
當日在場的蔡瀾及後解說，指狄娜是被他勸服，這個破格場面也奠定其性感女神地位。許冠文昨說沒有聽過這個傳聞，他提供另一個版本：「佢哋當時係有游說過，最後見佢都好樂意去做。」
另一名曾跟狄娜合作的導演龍剛，昨日在美國紐約接受長途電話訪問時，得知狄娜死訊時顯得有點錯愕：「狄娜入咗醫院我都唔知道，大家失咗聯絡好耐。啱啱嚟香港好可惜冇人同我講，唔係可以去探佢聚聚舊。狄小姐係好有智慧同思想嘅女士。」
狄娜在龍剛執導的電影《昨天今天明天》（原名《瘟疫》）中演出。龍剛嗚咽地說：「佢喺戲裏面係主角張沖嘅太太，因為套戲有好多演員，好似曾江、張英才，而且好多群戲，所以每人嘅戲份都唔會好重，佢都好畀心機演。」龍剛也曾在《冷暖親情》中跟狄娜合作演出。
對於外間視狄娜為一代尤物脫星，龍剛對此不以為意：「我唔理啲人點睇，人哋搵佢做係人哋嘅事，但係佢拍我嘅戲着好多衫。」
龍剛一再強調狄娜是人才，他說：「狄小姐真係非常有智慧嘅女性，非常聰明。我從來冇覺得佢係脫星，亦冇咁睇過佢，狄小姐喺片場對所有人都好好，可以用和藹可親嚟形容。真係好可惜返到香港都冇搵到佢。」
