街頭巷尾噚日熱論「奇女子」狄娜之死,中環人也八卦討論另一個奇女子近日舉動,焦點係發展局局長林鄭月娥。事緣前晚一國兩制研究中心慶祝成立20周年,主人家梁振英同恒隆陳啟宗理應最受注目,有赴會者卻同八方講,其實到場無非係想看有邊個大孖沙捧振英哥場,睇睇振英哥最新行程。
同愛國愛黨拉關係
可惜盛會冇帶來驚喜,反而有個意外收穫,就係見到謙稱唔係「好打得」嘅林鄭局長。雖然林鄭係問責官員,出席呢啲畀面派對係工作一部份,不過佢同《基本法》起草過程似乎冇乜關係,忽然現身,即時引來諸多揣測。
有人直指林鄭真係好博,博乜呢?咪就係同愛國愛黨人士拉關係囉。自從鬍鬚曾心臟病發入院,好多人基本上已不視佢在下屆特首跑馬仔之列,因此近幾個月跑馬仔焦點都係放在唐公子及梁振英身上,有建制派人士同八方講,其實佢哋都有留意到林鄭動向,覺得佢熱身動作多多,至於是否有意落場,暫時說不得準。
林鄭一直被視為未來司長人選,有冇可能出選特首呢?八方想像力冇咁豐富,綜合各方睇法,共通點係假如鬍鬚曾真係唔玩,林鄭不失為象徵「公務員治港」理想人選,除咗「CEO治港」、「商人治港」,相信北京方面都好想做多一手「公務員治港」準備。
林鄭上任後同大地產商過節多,強拍條例亦不受小業主歡迎,與唐公子、梁振英比較並無明顯民望優勢,有個挺唐派商界人士直言,唐公子加入政府做官多年,就算北京打算繼續「公務員治港」,唐公子都勝任有餘,呢位商人仲補充,若果北京想「公務員治港」,葉劉可能先係北京不二之選。
年齡係佢最大優勢
現年53歲嘅林鄭,兩年後才55歲,進可去馬參選,否則做司長亦毫無難度,假如真係有心更上一層樓,等多一屆都未遲,年齡係佢最大優勢,香港就算冇女特首,有特首女候選人都係好令人驚喜嘅事嚟喎!
mailto:[email protected]