歌神張學友噚日喺尖沙嘴搞咗個新歌《DoubleTrouble》MV首播禮，順道慶祝大碟《PrivateCorner》全亞洲銷量達20萬張，MV女主角杜鵑、導演夏永康同陳國輝都有捧場。今次MV花咗50萬製作，學友話：「終於明白唱片公司嘅困難，以前仲成日話要飛去第二度拍MV，原來拍MV好貴，本來諗住用20、30萬，點知超支，仲要導演同杜鵑都係冇收錢。」
早知Ronald結婚
隻碟由學友製作，大部份開支由自己畀，之前已經用咗10萬拍兩隻MV。問佢會唔會再拍MV，學友講笑話：「初頭諗住拍10個8個，家真係要睇形勢先。」係咪畀錢畀到肉痛？佢話：「淨係做歌手輕鬆好多，家未埋單，唔諗咁多。」問到係咪冇得喺無綫宣傳，所以花多啲錢做其他宣傳，學友話：「唔關事，始終大家方針唔同，都係暫時性，咁我啲歌都可以喺第二啲電視台播。」
學友同鄭中基（Ronald）私交甚篤，問佢知唔知Ronald結婚？學友尷尬話：「都知嘅，佢好耐之前同我講佢結咗婚。」咁知唔知老婆係蔡卓妍？學友笑住話：「當時我又冇問喎，之後就梗係知啦。」家Ronald離婚，學友話冇刻意安慰佢，但都想佢哋復合。