【本報訊】「刀槍能夠殺人，筆墨可以救人。」奇女子去了，留下百多字遺言，鼓勵傳媒工作者堅守崗位，秉承良知，繼續推進人類社會進步。曾經在大銀幕及「公仔箱」發光發熱的狄娜，晚年出書講述人生歷程，分享內地營商經驗，跨越媒體界限，努力傳揚正面人生觀。文化界人士指狄娜極有學養，她走的路，一改巿民對艷星的看法。
彭志銘：有急才有文采
次文化堂社長彭志銘指，狄娜是艷星出身，卻極有學養，「好多人對佢冇乜期望，覺得藝人文化水平唔夠，估唔到行出嚟眼前一亮，有一種風範，改變咗大家對女藝人嘅睇法。」
彭志銘表示，狄娜當年主持電視遊戲節目《得咗》，學識及急智令人另眼相看，「佢好有急才，又有文采，唔係講笑、亦唔係作狀，係真係口齒伶俐，呢啲唔係一朝一夕可以培養出嚟。」
彭形容，狄娜的內涵與現今出書的「才女」不能相提並論，「家啲所謂才女出書都係形象設計，係經理人公司嘅一種包裝，形象工程嘅一部份；狄娜出書，一唔係為錢，講名講利佢唔係好需要，係想對自己留一啲紀錄。」
狄娜很早期已經參與政治，彭志銘指，狄娜表面經商，實質為中共打好國際關係，絕少藝人做得到，「好少人咁樣去做，唔係家呢啲左派、民建聯攞着數嘅人可以比，佢做嘅事改變咗啲人對藝人嘅看法，但係好少人提及佢同埋讚賞佢，雖然佢係幫個政權，但都係幫緊中國人。」
電視劇創作人蕭若元說，狄娜一向留意政治時事，估計遺言是針對國務院總理溫家寶：「溫家寶最近喺人大講傳媒監察，似乎代表咗北京入面開明派嘅說話。」蕭猜想，狄娜是質疑溫家寶究竟是否相信傳媒，是否真的接受傳媒監察，遺言其實就是對溫家寶的異議。
蕭若元稱，狄娜政治立場鮮明，她參與政治的初期，正值四人幫時代，思想左傾，較抗拒改革開放。