大學教授流失嘅問題又嚟嘞，18年前幫中大藥劑學系開山嘅鼻祖李炯前決定轉戰馬拉，李教授去吉隆坡幫澳洲Monash大學成立藥劑學系。李教授做到7月就離開中大校園，佢話人生都想有第二個挑戰。另一個想再創事業高峯嘅名醫，係港大骨髓移植權威梁憲孫。
港大名醫流失
香港有第一批本土藥劑師，李炯前居功至偉，92年佢入中大全心全意幫第一屆藥劑學生搞認可專業資格，多年來桃李滿門，最近對面海港大藥劑系搞資格認可，都要搵佢畀意見。澳洲Monash大學在吉隆坡開私立大學，銳意發展醫科同藥劑學，藥劑學系要有猛人坐鎮，獵頭公司搵到上門，成功挖角。
李教授最近去咗KL一轉搵屋，當地啲屋閒閒哋幾千呎，月租都係6,000蚊港紙，加上空氣好，教授笑言可能樂不思蜀。雖然離開中大，不過進行中研究會繼續，亦會定時返嚟教書，因為佢係榮譽教授。
至於梁憲孫同港大頭頸癌權威韋霖雙雙去養和，分別做內科及外科話事人。梁教授係港大醫學院金漆招牌，醫學院最低潮嘅時候由佢出來做署任院長頂住，八方祝福佢在跑馬地再創高峯。