話就話冇政治任務，但前任特首董建華始終都係全國政協副主席，屬於國家級領導人，所以就算以私人身份訪台，都獲台灣高規格接待，先後與國民黨榮譽主席連戰同台灣海基會董事長江丙坤會面。連日奔波勞碌，董生噚日終於可以唞一唞，一整日喺花蓮觀光旅遊，進行真正嘅私人活動。
其實董生喺啟程時同傳媒講過，此行主要係觀光、探親同埋與朋友敍舊，冇帶政治議題，八方相信佢口中嘅朋友，都包括連戰同江丙坤，否則點會同佢哋摸住酒杯底食飯？董生今日結束台灣六日訪問行程。港、台兩地日前成立咗新組織加強溝通，唔知董生會唔會向稍後訪台嘅鬍鬚曾提供對台事務錦囊？