【絕世奇花1945-2010】世間上最令人傷痛莫過於喪失摯親，狄娜前日病逝，圈中人紛紛懷念這位一代奇女子，這個不幸的消息勾起羅蘭早年經歷喪母的慘痛回憶，她昨日既緬懷故友在片場上的點滴，又不忘勸勉狄娜兒子馬天如要堅強接受現實，盡快平復心情。
採訪：林妃
羅蘭：教授傳口才
「我都同佢合作過，最深印象係我試過喺無綫拍劇，佢喺隔籬廠錄《蒙太奇》，我有過去聽佢講嘢，佢口才真係好叻，我聽講佢搵教授教講嘢，不過呢啲都要肯學先得。當年一齊拍戲，我留意佢喺片場好勤力，成日坐埋一邊咪劇本。由於我同佢家人唔熟，所以呢幾年都冇聯絡，希望佢囝囝可以堅強啲，始終我都受過喪母之痛，真係最少3年先可以平復心情，希望佢學識接受呢個事實。」
周秀娜：打不死精神
「雖然我同狄娜姐姐唔同年代，但我入咗行，記者朋友將我哋拉埋一齊講，我都開始留意佢，今日聽到佢死訊好愕然。我覺得佢係一個當年好有思想嘅女性，好有代表性，我欣賞佢真我個性同打不死精神，仲有求知慾強，好值得後輩學習，佢對航天事業又有好大貢獻，相信佢真係花咗好多心機同時間。對於佢接受個女接受變性手術，我覺得思想好新，真係夠勁。」
胡楓：拍戲大排場
「我同狄娜合作過粵語片《神探一號》，但都好耐唔記得晒，我接受過佢主持嘅節目《蒙太奇》訪問，佢係事業好叻嘅女性，佢當年拍戲好有排場，成日坐大房車入片場。」
「佢係一個奇女子，我哋呢一輩都有聽聞，佢真係好叻好有頭腦而且又有性感嘅一面，我未真正見過佢本人，以前都有睇過佢粵語片，真係好有女人味同吸引力。」
張學友：人不能勝天
「我入行後佢都冇乜做過娛樂圈嘅嘢，都冇見過佢，都冇乜機會合作過，對狄娜嘅印象，我就覺得佢好tough，係好叻好成功嘅女人，但係無論人點叻都敵唔到個天。」
陳婉珍：智慧型女性
「我有睇過佢主持嘅節目，佢係好傳奇嘅智慧型女性。至於話佢嘅戲好大膽，要視乎當時嘅尺度，我最欣賞佢有自己獨特嘅風格，每一樣嘢都深思熟慮，做事好成功。」
浮生點滴：竹戰論狄娜
狄娜在《大軍閥》中的香艷演繹，至今仍為人津津樂道，其一代性感女神地位無人能取替。她的驕人身材也是市民熱話，有人將廣東麻雀「二筒」戲稱為「狄娜」，這個代號一直沿用至今。
一網講盡：集體回憶奇女子
一代性感女神離世，令人惋惜，網民紛紛在討論區留言哀悼。
tomli8880508：
我好喜歡狄娜小姐，佢係好叻的人，娜姐，我永遠記得你的口才，同埋你多年的演出。
lilylily：
人生真是虛空，也是捕風，猶如一場愚人的笑話。姑勿論她的背景，但也算是香港人的一個集體回憶，奇女子。
amengxiang：
Shewasanextremelycaringboss.R.I.P.,MsLeung.
shuen612612：
佢真係一個奇女子，一生不同凡響，希望佢早登極樂。
哈格維斯：
以為係假新聞，rip，以後冇得再睇佢主持大國崛起。
資料來源：香港討論區、高登討論區