球王馬勒當拿前日被愛犬咬傷單嘢惹來廣泛關注，佢似乎冇荒廢昔年擺脫後衞嘅超凡技術，用嚟擺脫記者一樣掂。據講佢喺醫院縫10針後，成功擺脫喺醫院外守候嘅記者，所以暫時冇乜人睇到佢破相後嘅貓樣。點都好，有口痕友話老馬俾愛犬咬係一個警示，係個天警告佢咪再用人惟親，否則隨時累死自己。
咬爆上唇縫10針
事件發生喺阿根廷時間禮拜二朝早，老馬喺布宜諾斯艾利斯近郊同隻叫Bela嘅中國沙皮狗玩，諗住錫吓佢啦，點知對方發狗癲失驚無神咬傷老馬口唇；老馬急急由女友陪同下到布宜諾斯艾利斯一間醫院，上唇縫10針。
消息一出，惹來大班記者喺醫院外守候，所謂人要面樹要皮，老馬當然唔想畀個爛嘴樣大家睇；據講傳咗幾次會走又唔走之後，原來已經由後門鬆人，仲由胞弟拉路揸車護送返屋企，令記者撲空。鬼咩，間醫院原來正正係佢當年因酗酒接受治療嘅地方，熟晒路，要甩班記者話咁易。
老馬事發後暫未公開露面，佢大女達瑪個男友就透露：「佢（老馬）冇事，心情唔錯，只須休息3日左右，肯定唔會影響備戰世界盃嘅部署。」今次事件最特別係Bela不嬲好乖，忽然咬主人或者係一個啟示，話畀就快點兵戰世盃嘅老馬聽，越親近、越信賴嘅可能都傷害到佢；回想阿根廷今屆世盃外用唔少嫡系，包括準女婿阿古路，結果搞到一鑊粥，驚濤駭浪之下至攞到決賽周入場券。
黑心講句，老馬掛彩，出名「烏鴉口」嘅球王比利係最大得益者。呢兩個「維園阿伯」不嬲鍾意舌戰，好似當老馬睇好美斯喺世盃大放異采，比利就睇死美斯唔掂。如今老馬傷嘴，至少呢幾日唔可以同比利鬥嘴啦！