今年第一季話咁快就玩完，埋單計數，港股表現就認真麻麻，希望放完復活節清明節長假後，大市第二季表現能脫胎換骨，一洗頹風。
不過，理想還你想，傳統投資諺語有句「五窮、六絕、七翻身」，而上市公司業績期又漸次完結，港股之後進入邊一款循環走勢只係靠估，但若然今年第二季大市擺脫唔到傳統魔咒，散戶要寄望下半年至有大茶飯。
江西銅業（358）去年純利僅升4%至23.83億元人民幣，其銅產品銷量受惠經濟回暖而增長，呢方面抵銷到價格下跌所帶來的影響。去年經濟環境咁差，份業績唔使「見紅」，保持有錢賺，都算有所交代。
集團預料今年銅價依然硬淨，主因係銅精礦生產成本逐步上升，而且市場需求保持，所以如果選炒金屬股，江西銅應喺投資名單之內。江西銅近日由低位反彈，但受制100日線阻力而回軟，昨跌2仙，報17.54元，入市只宜候跌穿17元後才考慮，中線目標19.50元。
方星俠