寶馬首席導師Ringo形容得好貼切，揸細馬力車猶如拖狗出街，佢唔肯行大可出啲力硬要佢行，最多反應慢啲。揸大馬力車就唔同，等同拖隻獅子出街，失驚無神推佢拉佢，只會招嚟反噬。想「馴獅」？Ringo話最緊要係攻彎四招。
記者：徐影龍
攝影：梁細權
鳴謝：BMWHK
寶馬耐不耐就會搞駕駛體驗，2010MExperience有好多BMW車主報名，$2,500報名費全撥捐「促進教育基金會」，好有意義。我上次參與係08年「縮水M3」135i，218匹馬力已儼如小獅子，今日坐上真真正正嘅M3，馬力倍升至420匹，仲講明教嘅係Racing心法，安全同速度並重，即係將會狠踩架M3。我豈敢怠慢，上Ringo理論課時，成世人都未試過咁聚精會神聽書。
01 BP最關鍵
高速入彎第一樣要面對，就係（BP）BrakePoint煞車點。現場以雪糕筒標示出BP同煞車距離，第一次140km/h收車入彎真係順好多。人好難感受高速行車速度，BP喺邊、踩幾耐，就需要慢慢掌握。
02 忌邊煞邊扭
緊隨要注意係踩Brake時軚盤要直，收啱速度先放Brake、扭軚，千萬不可邊踩Brake邊扭軚，事關重心已經極度偏向車頭，再急速扭軚只會甩尾或推頭而失控。
03 失控咪加速
唔啱速度入彎，只會失控飛出跑道。失控時切勿油門同Brake亂踩，軚盤又亂扭一通，自救法有EmergencyBraking，包括停止加速、減少軚盤扭動角度、望住逃離方向等。
04 出彎望遠啲
入彎線位以Out-in-out方式搵出弧度最低嘅路線。大外檔入彎，彎心貼內側，再以外側出彎。好神奇，聽Ringo教出彎時望遠啲，軌迹自自然然會變得更直。
狄Sir補充市區揸法：縮窒係大忌
落Track狠劈一輪，平復心情後見到狄Sir，梗要捉住佢，問吓實際上喺香港路面，揸「大獅子」出街又有乜要注意呢？「都係遵從GoldenRule（黃金定律，即係慢入快出），賽車煞車時間會求短，但現實就求Smooth啲。若賽車場預50米煞車，馬路上就起碼要留70米，基本上印住個Brake就得，唔使踩太深。」點為之深？「日本漫畫搵水測試係誇張咗，現實中大可擺個網球喺前座乘客位，煞車時球唔可以飛離張凳。」
「踩油門好忌一下子踩到好深，跟住覺得太快又突然縮腳，尤其大馬力嘅車，油門一踩一縮，重心已偏向車頭，再突然踩Brake，令車頭重上加重，車尾無晒下壓力，好易造成甩尾失控。城市中速度無落Track咁極端，大不了拖住Brake入彎，千祈唔好突然彎中煞車，因為速度已經OverSpeed，再加重心轉移，只會更難控制。」
唔使用水杯，狄Sir教用網球擺隔籬乘客位，可練出最佳煞車技巧。
大馬力車，油門同Brake都唔好突然縮窒，盡量Smooth啲。
入彎先發覺速度唔啱，大不了輕輕拖住Brake嚟入，切忌彎中突然煞車。
