早前憑《十月圍城》攞到亞洲電影大獎最佳男主角嘅63歲內地演員王學圻，近日入稟北京西城法院，要求同結婚39年嘅太太孫昌寧離婚。據內地傳媒噚日報道，王學圻喺71年同孫昌寧結婚，婚後生咗個仔王大慶。由於孫昌寧經常到外國出差，而佢自己本身又工作忙碌，所以兩公婆聚少離多，感情轉淡，兩人感情早已破裂，夫妻關係名存實亡，所以入稟法院要求離婚，並要求分割兩個人嘅共同財產。
拍戲畀老婆壓力
王學圻接受內地記者訪問時話：「這個事情不是一年兩年了。」佢認為自己職業畀太太帶嚟壓力，好似要拍接吻戲咁，至於離婚件事拖到家，係因為岳父一直患病。消息話孫昌寧係外交部文化參贊，大部份時間喺外地工作，包括先後喺澳洲悉尼同加拿大工作咗四年。
有記者曾經打電話畀孫昌寧，但佢唔想多講，只係話：「對不起，我不想談這個事情。」至於王學圻嘅36歲兒子王大慶，年前喺英國倫敦電影學院畢業，返去內地之後想做導演，但王學圻同佢老友張藝謀認為王大慶閱歷唔夠，所以王大慶最後都係老老實實咁開咗間廣告公司做老闆。