市場悶得太耐，投資者見個市肯升幾日已謝天謝地，可惜成交金額細，資金始終唔喺中港股市入面，中港股市搞乜鬼？
到底係我哋行快咗，全世界將要跟我哋跌，定係我哋會跟外圍升？政策市，冇得估，喺冇波幅又冇升幅嘅市況下，跟勢跟消息炒細價股已成為炒友每日指定動作。早幾日講過唔應該值25倍PE嘅滙銀家電（1280）繼續喺低成交配合下狂升，想博嘅要扣緊安全帶。開口中突然被大股東美的減持嘅威靈控股（382）即跌，投資者可以配股價0.42元作入市參考。早前分析過，家電下鄉始終水位唔多，想博好似海爾電器（1169）去年狂升5倍，家電股畀唔到你。
三林爆升可期
要搵爆升股，首要條件係價位細，有概念都唔夠，最好都仲係公司基本因素要有番咁上下，防守能力就更高。市場上反應遲鈍嘅醜女股有三林環球（3938），剛公佈半年業績轉虧為盈，賺1589萬美元。美元彈升幫咗佢滙兌收入，毛利率亦由8.6%升至12.1%，因為賣多咗毛利高嘅木地板。賣地板係早前全購內地ElegantLiving，帶動地板業務盈利大增至660萬美元，佔整體業務兩成，毛利率高達25%。
公司未來增長亮點，係出口新西蘭同馬來西亞嘅原木往中國，期內輸往中國嘅總額由21%急增至近三成，反映需求增加之餘，開始多客戶加定單代表滿意其產品質素。只可惜賣木始終唔係賺大錢嘅生意，因為毛利率只得7%。
要令呢隻股重現大牛市07年近3.40元嘅光輝，未來要睇中國需求，同佢主要銷往日本同美國起屋用嘅膠合板（Plywood）業務。去年日本建屋量跌至80萬間歷史低位，係45年來最差，有機會大翻身。三林嘅生意通常滯後樓市9個月，係經濟復蘇嘅最後梯隊，當美、日建屋數據好轉，就係三林爆升之時。
胡孟青